بلوچستان : دھماکہ میں 3افراد زخمی ، فائرنگ سے ہزارہ برادری کا ایک نوجوان ہلاک 2 زخمی

کوئٹہ(ڈیلی اردو) بلوچستان کے مختلف علاقوں میں پیش آنے والے دو الگ واقعات کے دوران دو بچوں سمیت تین افراد ہلاک جبکہ پانچ زخمی ہو گئے۔

پنجگور کے علاقے گوارگو میں فتح علی بازار کے قریب بچے کھیل رہے تھے کہ انہیں ایک مشتبہ ٹھوس چیز ملی۔ پولیس کے مطابق بچوں میں سے ایک نے اسے پتھر مار کر توڑنے کی کوشش کی، جس کے نتیجے میں زور دار دھماکا ہوا۔

پولیس حکام کے مطابق دھماکے میں دو بچے ہلاک جبکہ تین دیگر زخمی ہوئے۔ متاثرہ بچوں کی عمریں تقریباً 8 سے 12 سال کے درمیان بتائی گئی ہیں۔ زخمیوں کو طبی امداد کے لیے ہسپتال منتقل کر دیا گیا، جبکہ واقعے کی نوعیت اور دھماکا خیز مواد سے متعلق تحقیقات جاری ہیں۔

دوسری جانب کوئٹہ کے مغربی بائی پاس کے قریب فائرنگ کے ایک واقعے میں ہزارہ برادری سے تعلق رکھنے والا ایک نوجوان ہلاک اور دو افراد زخمی ہو گئے۔

پولیس کے مطابق ہزارہ ٹاؤن سے تعلق رکھنے والے افراد بولان میں پکنک کے بعد واپس کوئٹہ جا رہے تھے کہ مغربی بائی پاس کے علاقے میں نامعلوم افراد نے ان کی گاڑی کو فائرنگ کا نشانہ بنایا۔

پولیس حکام کے مطابق فائرنگ سے ایک نوجوان موقع پر ہلاک جبکہ دو افراد زخمی ہوئے۔ نیو سریاب پولیس کے ایس پی عابد بخاری نے بتایا کہ واقعے کی تحقیقات کی جا رہی ہیں اور ابتدائی طور پر اسے ٹارگٹ کلنگ قرار نہیں دیا گیا۔