بلوچستان: رخشاں ڈویژن کے کمشنر اسداللہ کاکڑ خاران جاتے ہوئے اغوا ہوگئے

رخشان(ڈیلی اردو) بلوچستان میں اعلیٰ سرکاری افسران کے اغوا کے واقعات میں ایک اور اضافہ ہوگیا،بلوچستان کے شورش زدہ رخشاں ڈویژن کے کمشنر اسداللہ کاکڑ کو خاران جاتے ہوئے ضلع خاران کے علاقے برشونکی سے اغوا کیے جانے کی اطلاع ہے۔ ایک سینئر سرکاری اہلکار نے واقعے کی تصدیق کرتے ہوئے بتایا کہ مسلح افراد کمشنر اور ان کے ڈرائیور کو اپنے ساتھ لے گئے، جبکہ گاڑی میں موجود کلرک اور کیشیئر کو چھوڑ دیا گیا۔

حکام کے مطابق اسداللہ کاکڑ کوئٹہ میں ایک اجلاس میں شرکت کے بعد جمعرات کو ڈویژنل ہیڈکوارٹر خاران کے لیے روانہ ہوئے تھے۔ ان کی گاڑی جب برشونکی کے قریب پہنچی تو مسلح افراد نے اسے روک لیا اور کمشنر سمیت ڈرائیور کو نامعلوم مقام پر منتقل کردیا۔ واقعے کے بعد کمشنر اور ڈرائیور کی بازیابی سے متعلق تفصیلات سامنے نہیں آئیں۔

یہ واقعہ بلوچستان میں حالیہ عرصے کے دوران کسی اعلیٰ سرکاری عہدیدار کے اغوا کا تیسرا نمایاں واقعہ بتایا جارہا ہے۔ اس سے قبل 20 ستمبر کو خاران کے ڈپٹی کمشنر منیر احمد سومرو کو تین دیگر افراد سمیت اغوا کیا گیا تھا۔ اطلاعات کے مطابق ڈپٹی کمشنر اور ان کے ساتھ اغوا ہونے والے ایک شخص کو 2 اکتوبر کو رہا کردیا گیا، جبکہ ان کے گن مین اور ڈرائیور کو اس سے پہلے چھوڑ دیا گیا تھا۔

اسی طرح ایڈیشنل سیشن جج پنجگور کوئٹہ سے پنجگور جاتے ہوئے ضلع سوراب کے علاقے میں اغوا کرلیے گئے تھے۔ بعد ازاں انہیں اور ان کے ہمراہ اغوا کیے گئے پولیس اہلکار کو رہا کردیا گیا تھا۔ بلوچستان میں مسلسل پیش آنے والے ان واقعات نے سرکاری افسران کی نقل و حرکت اور سکیورٹی کے انتظامات پر تشویش بڑھا دی ہے۔