بلوچستان میں سیکورٹی فورسز کی مختلف کارروائیاں، 33 دہشتگرد ہلاک کرنے کا دعویٰ

کوئٹہ (ڈیلی اردو) شورش زدہ صوبہ بلوچستان میں سیکیورٹی فورسز نے دہشتگردوں کے خلاف مختلف کارروائیوں کے دوران 33 دہشتگردوں کو ہلاک کرنے کا دعویٰ کیا ہے۔ آئی ایس پی آر کے مطابق یہ کارروائیاں 21 ستمبر سے صوبے کے مختلف علاقوں میں جاری ہیں، جبکہ کارروائیوں کے دوران اسلحہ، گولہ بارود اور دھماکا خیز مواد بھی برآمد کیا گیا۔

آئی ایس پی آر کے مطابق 24 ستمبر کو آپریشن شبان کے دوران دہشتگردوں کے مزید ٹھکانوں کو نشانہ بنایا گیا، جہاں شدید فائرنگ کے تبادلے میں 5 دہشتگرد ہلاک ہوئے۔ ان ہلاکتوں کے بعد آپریشن شبان میں ہلاک ہونے والے دہشتگردوں کی تعداد 22 ہوگئی ہے۔ فورسز نے ٹھکانوں سے اسلحہ، گولہ بارود اور دھماکا خیز مواد قبضے میں لینے کا بھی بتایا ہے، جبکہ علاقے میں کلیئرنس کارروائی جاری رکھنے کا اعلان کیا گیا ہے۔

دوسری جانب 25 ستمبر کو نوشکی میں انٹیلی جنس بنیادوں پر کارروائی کی گئی۔ آئی ایس پی آر کے مطابق سیکیورٹی فورسز نے دہشتگردوں کے ایک ٹھکانے کو نشانہ بنایا، جس کے بعد فائرنگ کا شدید تبادلہ ہوا اور 11 دہشتگرد ہلاک ہوگئے۔ فوج کے مطابق بلوچستان میں 21 ستمبر سے جاری مختلف کارروائیوں میں ہلاک ہونے والے دہشتگردوں کی مجموعی تعداد 33 ہوگئی ہے۔

آئی ایس پی آر کا کہنا ہے کہ آپریشن عزمِ استحکام کے تحت سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔ حکام کے مطابق کارروائیوں کا مقصد دہشتگرد نیٹ ورکس کا خاتمہ اور متاثرہ علاقوں میں سیکیورٹی کی صورتحال بہتر بنانا ہے۔