بلوچستان: کیچ میں ٹارگٹ کلنگ اور جبری گمشدگیوں کیخلاف شٹر ڈاؤن ہڑتال

کوئٹہ (ڈیلی اردو/بی بی سی) پاکستان کے صوبے بلوچستان کے ضلع کیچ کے ہیڈ کوارٹر تربت میں معروف ماہر تعلیم شریف ذاکر پر قاتلانہ حملے، ٹارگٹ کلنگ اور جبری گمنشدگیوں کے واقعات کے خلاف شٹر ڈائون ہڑتال کی گئی۔

شٹرڈائون ہڑتال کی کال تربت سول سوسائٹی کی جانب سے دی گئی تھی جس کے باعث شہر کے تمام تجارتی مراکز بند رہے جبکہ سڑکوں پر ٹریفک معمول سے کم رہی۔

شریف ذاکر تربت میں ایک ٹیچر کے علاوہ معروف نجی تعلیمی ادارے کے ڈائریکٹر بھی ہیں۔ ان پر حملے کے خلاف تربت میں نجی تعلیمی ادارے بھی بند رہے۔

شریف ذاکر پر گذشتہ روز نامعلوم افراد نے شہر کے مرکزی علاقے سے دو کلومیٹر دور کوشک ملک آباد کے علاقے میں حملہ کیا تھا جس میں گولی لگنے سے وہ زخمی ہوئے تھے۔

تربت پولیس سٹیشن کے ایک اہلکار نے فون پر بی بی سی کو بتایا کہ شریف ذاکر پر حملے کا مقدمہ پولیس سٹیشن میں نامعلوم افراد کے خلاف درج کیا گیا ہے۔

تربت سول سوسائٹی کے کنوینر گلزار دوست نے بتایا کہ شریف ذاکر پر حملے سے قبل ان کے بھائی کو قتل کیا گیا لیکن ملزمان کے خلاف کوئی کارروائی نہیں ہوئی۔

ان کا کہنا تھا کہ چار فروری کو شریف ذاکر کے بیٹے کامل شریف اور بھتیجے احسان سرور کو مبینہ طور پر جبری طور پر لاپتہ کیا گیا جن کی تاحال بازیابی نہیں ہوئی۔

گلزار دوست نے کہا کہ چند روز قبل تربت شہر میں ایک اور سیاسی کارکن اور ایم فل اسکالر اللہ داد بلوچ کو بھی ٹارگٹ کلنگ کا نشانہ بنایا گیا۔