بنوں میں سیکیورٹی فورسز کا آپریشن، دہشتگرد کمانڈر ہلاک، 5 کا گھیراؤ

بنوں(ڈیلی اردو)خیبرپختونخواہ کے شورش زدہ ضلع سیکیورٹی فورسز نے خفیہ اطلاعات کی بنیاد پر مَمند خیل کے علاقے میں دہشتگردوں کی موجودگی کی اطلاع پر کارروائی کی، جس کے دوران ایک اہم کمانڈر ہلاک ہونے کی اطلاع ہے جبکہ 5 دہشتگردوں کو علاقے میں گھیرے میں لے لیا گیا۔

ابتدائی اطلاعات کے مطابق سیکیورٹی فورسز نے دہشتگردوں کے مشتبہ ٹھکانے کو گھیرے میں لے کر کارروائی کا آغاز کیا۔ آپریشن میں اسپیشل سروسز گروپ (ایس ایس جی) کے اہلکاروں نے بھی حصہ لیا، جبکہ کارروائی کے دوران دہشتگرد کمانڈر فتح اللہ مَمند خیل کے ہلاک ہونے کی اطلاع سامنے آئی ہے۔

ذرائع کے مطابق علاقے میں آپریشن تاحال جاری ہے اور سیکیورٹی فورسز کی جانب سے سرچ اور کلیئرنس کارروائیاں بھی کی جا رہی ہیں۔ گھیرے میں موجود 5 دہشتگردوں کی حتمی صورتحال سمیت آپریشن کے مکمل نتائج کی مزید تفصیلات کارروائی مکمل ہونے اور اطلاعات کی تصدیق کے بعد سامنے آنے کا امکان ہے۔

ابتدائی اطلاعات میں مزید ہلاکتوں، گرفتاریوں یا اسلحہ برآمد ہونے کی تفصیلات سامنے نہیں آئی ہیں، جبکہ متعلقہ اداروں کی جانب سے حتمی معلومات کا انتظار ہے۔