بھارت: اعظم گڑھ میں القاعدہ کے نظریات سے متاثر 19 سالہ نوجوان گرفتار

اعظم گڑھ(ڈیلی اردو) بھارت کی ریاست اتر پردیش میں انسداد دہشتگردی اسکواڈ نے اعظم گڑھ سے 19 سالہ نوجوان کو گرفتار کرنے کا دعویٰ کیا ہے۔ حکام کے مطابق نوجوان پر ممنوعہ تنظیم القاعدہ برصغیر (اے کیو آئی ایس) کے نظریات سے متاثر ہو کر سوشل میڈیا کے ذریعے نوجوانوں کو شدت پسندانہ نظریات کی طرف راغب کرنے اور مبینہ طور پر تنظیمی سرگرمیوں سے جوڑنے کی کوشش کا الزام ہے۔

گرفتار نوجوان کی شناخت محمد نبیل ولد محمد دانش کے طور پر کی گئی ہے، جو اعظم گڑھ کے دیدار گنج تھانے کی حدود میں واقع چتارہ محمود پور کا رہائشی بتایا گیا ہے۔

اتر پردیش اے ٹی ایس کے مطابق انٹیلی جنس معلومات کی بنیاد پر نوجوان کی آن لائن سرگرمیوں کی نگرانی کی گئی، جس کے بعد اس کے خلاف مقدمہ درج کیا گیا۔ حکام کا کہنا ہے کہ تفتیش کے دوران اس کے موبائل فون اور سوشل میڈیا رابطوں سے مبینہ طور پر ایسے شواہد ملے جن سے القاعدہ کے شدت پسندانہ نظریات سے وابستگی کا شبہ ظاہر ہوا۔

تحقیقاتی حکام کے مطابق نوجوان مختلف پیغام رسانی گروپس سے منسلک تھا اور بعض گروپس میں القاعدہ سے متعلق مواد اور شدت پسندانہ لٹریچر شیئر کیا جاتا تھا۔ تفتیش میں بیرون ملک سفر اور مبینہ تربیت سے متعلق گفتگو سامنے آنے کا بھی دعویٰ کیا گیا ہے۔

اے ٹی ایس کے مطابق ڈیجیٹل آلات کی جانچ کے دوران بعض گروپس میں مخصوص اصطلاحات اور کوڈ الفاظ کے استعمال کا بھی انکشاف ہوا۔ حکام کا کہنا ہے کہ ان رابطوں اور مواد کی بنیاد پر نوجوان کے ممکنہ دیگر ساتھیوں اور اس سے وابستہ آن لائن نیٹ ورک کی چھان بین کی جا رہی ہے۔

حکام نے بتایا کہ ملزم کے خلاف بھارتیہ نیایہ سنہتا اور غیر قانونی سرگرمیوں کی روک تھام کے قانون کے تحت مقدمہ درج کیا گیا ہے۔ اسے عدالت میں پیش کردیا گیا ہے جبکہ اس کے موبائل فون، چیٹس اور دیگر ڈیجیٹل شواہد کی مزید فرانزک جانچ جاری ہے۔

اے ٹی ایس کے مطابق تحقیقات کا مقصد یہ معلوم کرنا ہے کہ گرفتار نوجوان کی سرگرمیاں اس کی ذاتی سطح تک محدود تھیں یا وہ کسی وسیع تر نیٹ ورک کے ساتھ بھی رابطے میں تھا۔ اس معاملے میں سامنے آنے والے الزامات بھارتی تحقیقاتی ادارے کے مؤقف پر مبنی ہیں۔