بھارت کے زیر انتظام کشمیر: سوپور کے جنگلات سے اسلحے اور دھماکہ خیز مواد کا بڑا ذخیرہ برآمد

سرینگر(ڈیلی اردو) بھارت کے زیر انتظام کشمیر کے علاقے سوپور میں پولیس نے خفیہ اطلاع پر کارروائی کرتے ہوئے جنگلات سے بھاری مقدار میں اسلحہ، گولہ بارود اور دھماکہ خیز مواد برآمد کرنے کا دعویٰ کیا ہے۔ پولیس کے مطابق یہ کارروائی تھانہ بومائی کی حدود میں واقع مقام چرہار کے جنگلات میں کی گئی۔

حکام کے مطابق تلاشی کے دوران ایک بڑے پتھر کے نیچے چھپایا گیا نیلے رنگ کا ڈرم اور ایک بیگ ملا۔ مشتبہ دھماکہ خیز مواد کی موجودگی کے پیش نظر بم ناکارہ بنانے والے دستے کو طلب کیا گیا، جس کے بعد علاقے کی مکمل تلاشی لی گئی۔

پولیس کے مطابق برآمد ہونے والے سامان میں دو اسالٹ رائفلیں، جن میں اے کے 47 اور اے کے 76 شامل ہیں، سات میگزین، چار پستول اور ان کے چار میگزین، ایک ملٹی گرینیڈ لانچر اور اس کے پانچ راؤنڈز شامل ہیں۔ اس کے علاوہ 11 دستی بم، ریموٹ کنٹرول سے چلنے والے تین دیسی ساختہ دھماکہ خیز آلات (آئی ای ڈی)، آٹھ ڈیٹونیٹرز اور دو ٹائمر بھی برآمد کیے گئے۔

پولیس نے موقع سے تاریں، بیٹریاں، دھماکہ خیز مواد سے متعلق دیگر پرزے، پرائما کورڈز اور مواصلاتی آلات بھی قبضے میں لینے کی اطلاع دی ہے۔ تمام برآمد شدہ سامان کو حفاظتی اقدامات کے بعد تحویل میں لے لیا گیا۔

واقعے کے سلسلے میں تھانہ بومائی میں غیر قانونی سرگرمیوں کی روک تھام کے قانون، اسلحہ ایکٹ اور دھماکہ خیز مواد سے متعلق قانون کی دفعات کے تحت مقدمہ نمبر 66/2026 درج کرکے تحقیقات شروع کر دی گئی ہیں۔ پولیس کا کہنا ہے کہ اسلحے کے ذخیرے کے ماخذ، اسے چھپانے والوں اور ممکنہ دہشت گردانہ روابط کا سراغ لگایا جا رہا ہے۔