بھارت کے زیر انتظام کشمیر: پونچھ میں ایل او سی کے قریب 5 بارودی سرنگیں تباہ

جموں(ڈیلی اردو) بھارت کے زیر انتظام کشمیر کے ضلع پونچھ میں لائن آف کنٹرول (ایل او سی) کے قریب فوج نے پانچ بارودی سرنگوں کا سراغ لگا کر انہیں ناکارہ بنا دیا۔ حکام کے مطابق اس کارروائی میں کوئی جانی یا مالی نقصان نہیں ہوا۔

حکام نے بتایا کہ ہفتے کی صبح فوجی گشتی دستے کو بسونی ٹاپ کے علاقے میں سرحدی باڑ کے قریب دو بارودی سرنگیں ملیں، جبکہ اسی مقام کے قریب جمعے کو بھی تین بارودی سرنگیں برآمد ہوئی تھیں۔ بم ناکارہ بنانے والے فوجی دستے نے کنٹرولڈ دھماکوں کے ذریعے تمام پانچوں سرنگوں کو تباہ کر دیا۔

حکام کے مطابق لائن آف کنٹرول کے اگلے علاقوں میں دراندازی روکنے کے لیے حفاظتی انتظامات کے تحت بارودی سرنگیں بچھائی گئی ہیں، تاہم شدید بارشوں کے باعث بعض سرنگیں اپنی جگہ سے ہٹ کر زمین کی سطح پر آ جاتی ہیں، جس سے مقامی آبادی کے لیے خطرات پیدا ہو سکتے ہیں۔