بھارتی عدالت نے حافظ سعید کے خلاف دو ماہ میں دوسرا ناقابل ضمانت وارنٹ جاری کردیا

جموں(ڈیلی اردو) بھارت کے زیر انتظام کشمیر میں دہشتگردی سے متعلق ایک مقدمے میں لشکر طیبہ کے بانی حافظ سعید کے خلاف دو ماہ کے دوران دوسرا ناقابل ضمانت وارنٹ جاری کردیا گیا۔

بھارتی قومی تحقیقاتی ادارے (این آئی اے) نے جموں کی خصوصی عدالت کو بتایا کہ حافظ سعید پاکستان کے شہر سرگودھا کے رہائشی ہیں اور مذکورہ مقدمے میں مطلوب ہیں۔ تحقیقاتی ادارے کے مطابق وہ گرفتاری سے بچنے کے لیے پاکستان میں موجود ہیں اور بھارت کے زیر انتظام کشمیر میں سرگرم دہشتگردوں کو مبینہ طور پر مالی معاونت، اسلحہ اور ہدایات فراہم کرتے رہے ہیں۔

یہ مقدمہ سری نگر کے نواحی علاقے پانڈچ سے محمد نقیب بھٹ نامی شخص کی گرفتاری کے بعد سامنے آیا۔ این آئی اے کے مطابق گرفتاری کے وقت اس کے قبضے سے چینی ساختہ دستی بم اور 15 زندہ کارتوس برآمد ہوئے تھے۔

تحقیقات آگے بڑھنے پر بھارتی حکام نے لشکر طیبہ اور دی ریزسٹنس فرنٹ سے وابستہ متعدد افراد کے علاوہ دو پاکستانی شہریوں کو بھی گرفتار کرنے کا دعویٰ کیا۔ این آئی اے کے مطابق تفتیش کے دوران گرفتار افراد کے مبینہ روابط حافظ سعید سے سامنے آئے، جس کے بعد ان کے خلاف عدالتی کارروائی کا دائرہ بڑھایا گیا۔

رپورٹ کے مطابق 8 ستمبر کو این آئی اے ایکٹ کے تحت خصوصی جج پریم ساگر نے کیس کی سماعت کی اور حافظ سعید کے خلاف ناقابل ضمانت وارنٹ جاری کرنے کا حکم دیا۔ یہ دو ماہ کے عرصے میں ان کے خلاف جاری ہونے والا دوسرا ناقابل ضمانت وارنٹ ہے۔

اس سے قبل 8 جولائی کو پہلگام حملے سے متعلق مقدمے میں بھی حافظ سعید کے خلاف ناقابل ضمانت وارنٹ جاری کیا گیا تھا۔ بھارتی حکام کے مطابق اس حملے میں 25 سیاح اور ایک مقامی شہری ہلاک ہوئے تھے۔

این آئی اے کی جانب سے پیش کیے گئے مؤقف کی بنیاد پر عدالت نے تازہ وارنٹ جاری کیا ہے، جبکہ حافظ سعید پر عائد الزامات بھارتی تحقیقاتی ادارے کے دعووں پر مبنی ہیں۔