ترکی شام میں کرد جنگجوؤں کیخلاف فوجی آپریشن روک دے: صدر یورپین کمیشن

برسلز (ڈیلی اردو/نیوز ایجنسیاں) یورپی کمیشن کے صدر جیان کلاؤڈ جنکر نے ترکی سے مطالبہ کیا ہے کہ وہ شام میں کرد جنگجوؤں کے خلاف اپنی فوجی کارروائی روک دے۔ انھوں نے ترکی پر واضح کیا ہے کہ اگر اس نے یہ کارروائی جاری رکھی تو یورپی یونین شام میں مجوزہ ’سیف زون‘ کے قیام کے لیے کوئی رقم نہیں دے گی۔

جیان کلاؤڈ جنکر نے یورپی پارلیمان میں بیان دیتے ہوئے کہا: ’’میں ترکی اور دوسرے کرداروں پر زور دوں گا کہ وہ ضبط و تحمل سے کام لیں اور جاری آپریشنز کو روک دیں۔‘‘

ان کے اس مطالبے سے چند لمحے قبل ہی ترک صدر رجب طیب ایردوآن نے بدھ کو شام کے شمال مشرقی علاقے میں کرد جنگجوؤں کے خلاف فوجی کارروائی شروع کرنے کا اعلان کیا ہے۔ انھوں نے شام کے شمال میں اس کارروائی کو ’آپریشن امن بہار‘ کا نام دیا ہے۔

انھوں نے ٹویٹر پر لکھا کہ ’’اس فوجی کارروائی میں شمالی شام میں کرد جنگجوؤں اور داعش کو نشانہ بنایا جارہا ہے۔ ہمارے مشن کا مقصد ہماری جنوبی سرحد پر دہشت گردی کی راہداری کو قائم ہونے سے روکنا اور علاقے میں امن کا قیام ہے۔‘‘