تیراہ میں کواڈ کاپٹر حملے، کمسن لڑکی ہلاک، خاتون اور بچہ زخمی

خیبر(ڈیلی اردو) خیبرپختونخواہ کے شورش زدہ قبائلی ضلع خیبر کے علاقے تیراہ میں کواڈ کاپٹر حملوں کے دو واقعات میں ایک کمسن لڑکی ہلاک جبکہ خاتون اور بچے کے زخمی ہونے کی اطلاعات سامنے آئی ہیں۔

ذرائع کے مطابق دونوں واقعات تیراہ کے علاقے شڈلہ میں پیش آئے، جہاں کواڈ کاپٹر حملوں کی زد میں شہری آبادی بھی آئی۔ متاثرین میں خواتین اور بچے شامل ہیں، جس کے باعث علاقے میں خوف و ہراس پھیل گیا۔

ذرائع کا کہنا ہے کہ تیراہ کے مختلف علاقوں میں کواڈ کاپٹر حملوں کے علاوہ مارٹر گولے فائر کیے جانے کی اطلاعات بھی موصول ہوئی ہیں، تاہم ان واقعات میں ہونے والے مجموعی جانی یا مالی نقصان کی مکمل تفصیلات فوری طور پر سامنے نہیں آسکیں۔

شڈلہ میں ڈرون اور مارٹر حملوں کے بعد مقامی آبادی میں سیکیورٹی صورتحال کے حوالے سے شدید تشویش پائی جاتی ہے، جبکہ واقعے سے متعلق مزید معلومات سامنے آنے کا انتظار ہے۔