جرمنی میں مسلمانوں کے خلاف نفرت اور اسلاموفوبیا میں تشویشناک اضافہ

برلن (ڈیلی اردو/نیوز ایجنسیاں) جرمنی میں مسلمانوں کے خلاف نفرت، امتیازی سلوک اور اسلام مخالف واقعات میں نمایاں اضافہ ریکارڈ کیا گیا ہے۔ اسلاموفوبیا اور مسلمانوں کے خلاف نفرت انگیز واقعات کی نگرانی کرنے والے نیٹ ورک CLAIM کی تازہ رپورٹ کے مطابق گزشتہ سال ملک بھر میں اس نوعیت کے 4,096 واقعات سامنے آئے، جن میں 214 جسمانی تشدد کے واقعات بھی شامل تھے۔

رپورٹ میں کہا گیا ہے کہ اصل تعداد اس سے کہیں زیادہ ہو سکتی ہے کیونکہ بہت سے متاثرین خوف، عدم اعتماد یا ممکنہ ردعمل کے خدشے کے باعث ایسے واقعات رپورٹ ہی نہیں کرتے۔

CLAIM کے مطابق متاثرین کو بالخصوص اسکولوں، سرکاری اداروں اور پولیس کے ساتھ معاملات میں شکایات درج کرانے کے دوران متعدد رکاوٹوں کا سامنا کرنا پڑتا ہے۔ کئی والدین اپنے بچوں کے خلاف ممکنہ انتقامی کارروائی کے خوف سے خاموش رہنے کو ترجیح دیتے ہیں۔

رپورٹ میں خبردار کیا گیا ہے کہ خاموشی کا مطلب یہ نہیں کہ متاثرین کو نقصان نہیں پہنچ رہا، بلکہ ایسے واقعات ان کے معیارِ زندگی، ذہنی صحت اور احساسِ تحفظ پر گہرے اور دیرپا منفی اثرات مرتب کرتے ہیں۔ اس کے نتیجے میں مسلم برادری میں خوف، بے یقینی اور مایوسی کی فضا بھی بڑھ رہی ہے۔

نیٹ ورک کے مطابق 2024 میں جرمنی کی 16 میں سے 13 وفاقی ریاستوں کے 26 مشاورتی مراکز نے اسلام مخالف واقعات ریکارڈ کیے تھے، جبکہ گزشتہ سال سروے میں شریک مراکز کی تعداد بڑھ کر 15 ریاستوں میں 38 ہو گئی۔ اسی وجہ سے دونوں برسوں کے اعداد و شمار کا براہِ راست موازنہ احتیاط سے کیا جانا چاہیے۔