جنوبی افریقہ میں فائرنگ کے دو واقعات، 27 افراد ہلاک اور 26 زخمی

کیپ ٹاؤن(ڈیلی اردو) جنوبی افریقہ میں فائرنگ کے دو الگ واقعات میں کم از کم 27 افراد ہلاک اور 26 زخمی ہوگئے۔ پولیس کے مطابق ایک واقعہ جوہانسبرگ کے مغربی علاقے میں واقع ایک بار جبکہ دوسرا کیپ ٹاؤن کے قریب تفریحی مقام پر پیش آیا۔

پولیس کے مطابق جوہانسبرگ کے قریب بار میں آٹھ مسلح افراد نے اچانک فائرنگ کردی۔ حملہ آوروں نے پہلے بار کے باہر موجود افراد کو نشانہ بنایا اور بعد ازاں اندر داخل ہوکر بھی فائرنگ جاری رکھی۔ اس واقعے میں 17 افراد ہلاک جبکہ 15 زخمی ہوئے۔

حکام کے مطابق ہلاک ہونے والوں میں 13 مرد اور 4 خواتین شامل ہیں۔ حملہ آوروں نے فرار ہونے سے قبل بعض افراد کی تلاشی لے کر ان کے موبائل فون بھی چھینے اور دو گاڑیوں کو آگ لگا دی، جس کے بعد وہ دوسری گاڑیوں میں فرار ہوگئے۔

پولیس کا کہنا ہے کہ حملے کے محرکات تاحال واضح نہیں، تاہم ابتدائی تفتیش میں اسے ممکنہ طور پر کسی سابقہ تنازع یا حساب چکانے کی کارروائی کے طور پر بھی دیکھا جا رہا ہے۔ حکام کے مطابق تفتیش کاروں کے پاس مشتبہ حملہ آوروں کی واضح تصاویر موجود ہیں۔

پولیس نے بتایا کہ حملے میں ہلاک ہونے والے افراد میں سے ایک شخص گزشتہ ماہ اسی بار میں ہونے والی فائرنگ کے واقعے میں مطلوب تھا۔ اس واقعے میں ایک شخص ہلاک اور دوسرا زخمی ہوا تھا۔

دوسرا واقعہ کیپ ٹاؤن کے قریب لوانڈلی میں پیش آیا، جہاں مسلح افراد نے علی الصبح ایک تفریحی مقام میں داخل ہوکر وہاں موجود لوگوں پر فائرنگ کردی۔ پولیس کے مطابق اس حملے میں 10 افراد ہلاک اور 11 زخمی ہوئے۔ پانچ افراد موقع پر ہلاک ہوئے جبکہ دیگر نے اسپتال منتقل کیے جانے کے دوران دم توڑا۔

پولیس کے مطابق دونوں واقعات کے سلسلے میں تاحال کسی مشتبہ شخص کی گرفتاری عمل میں نہیں آئی۔ حکام نے حملوں کی وجوہات اور ممکنہ طور پر ایک دوسرے سے تعلق سمیت مختلف پہلوؤں سے تحقیقات شروع کردی ہیں۔

جنوبی افریقہ میں فائرنگ کے واقعات ایک عرصے سے سکیورٹی کے لیے بڑا چیلنج بنے ہوئے ہیں، جن میں بعض واقعات کا تعلق جرائم پیشہ گروہوں اور مقامی تنازعات سے بتایا جاتا ہے۔ جوہانسبرگ کے بعض علاقوں میں غیر قانونی کان کنی سے منسلک جرائم پیشہ نیٹ ورکس کے خلاف پولیس اور فوج کی مشترکہ کارروائیاں بھی جاری ہیں۔