جنوبی وزیرستان میں قبائلی رہنما ملک نیک محمد محسود فائرنگ سے ہلاک

جنوبی وزیرستان (ڈیلی اردو) خیبرپختونخواہ کے شورش زدہ قبائلی ضلع بالائی جنوبی وزیرستان کی تحصیل لدھا کے علاقے منزکئی میں مسلح دہشتگردوں نے فائرنگ کرکے ممتاز قبائلی رہنما ملک نیک محمد محسود کو ہلاک کردیا۔ حملہ آور کارروائی کے بعد پہاڑی علاقے کی جانب فرار ہوگئے۔

ابتدائی اطلاعات کے مطابق ملک نیک محمد محسود کو منزکئی میں نشانہ بنایا گیا۔ واقعے کے بعد سیکیورٹی اداروں نے علاقے میں کارروائی شروع کرتے ہوئے حملے کے محرکات اور ذمہ داروں کا سراغ لگانے کے لیے تحقیقات کا آغاز کردیا ہے۔

ملک نیک محمد محسود علاقے میں امن، سماجی ہم آہنگی اور استحکام کے لیے کردار ادا کرنے والی قبائلی شخصیات میں شمار ہوتے تھے۔ ان پر حملہ جنوبی وزیرستان میں مذہبی اور قبائلی عمائدین کو نشانہ بنانے کے واقعات کے تسلسل کے تناظر میں دیکھا جا رہا ہے۔

اس سے قبل 3 اگست کو وانا کے صدر بازار میں دھماکے کے نتیجے میں ممتاز مذہبی و قبائلی شخصیت مفتی جانمیر بھی ہلاک ہوئے تھے۔ وہ قومی امن جرگہ کے رکن اور خطے میں امن و مفاہمت کے لیے سرگرم تھے۔

اسی طرح جنوبی وزیرستان کے اعظم ورسک کے علاقے میں جے یو آئی (ف) سے وابستہ مولانا اسماعیل کو بھی ٹارگٹ حملے میں نشانہ بنایا گیا تھا۔

قبائلی اور مذہبی شخصیات کے خلاف مسلسل حملوں نے علاقے میں امن و استحکام کے لیے سرگرم مقامی عمائدین کے تحفظ سے متعلق تشویش میں اضافہ کردیا ہے۔ سیکیورٹی حکام ملک نیک محمد محسود کے قتل کی تحقیقات کر رہے ہیں اور حملے میں ملوث افراد کی تلاش جاری ہے۔