جنوبی وزیرستان میں وانا کیڈٹ کالج پر خودکش حملہ، دو شدت پسند ہلاک

راولپنڈی (ڈیلی اردو) پاکستانی فوج کے شعبہ تعلقات عامہ (آئی ایس پی آر) کے مطابق 10 نومبر کو قبائلی ضلع جنوبی وزیرستان کے علاقے وانا میں کیڈٹ کالج پر شدت پسندوں نے حملہ کیا۔

آئی ایس پی آر کے مطابق حملہ آوروں نے دھماکہ خیز مواد سے بھری گاڑی کالج کے مرکزی گیٹ سے ٹکرا دی، جس کے نتیجے میں گیٹ منہدم ہو گیا اور ملحقہ انفراسٹرکچر کو نقصان پہنچا۔

دھماکے کے فوراً بعد مسلح شدت پسند کالج میں داخل ہونے کی کوشش کرنے لگے تاہم سیکیورٹی فورسز نے جوابی کارروائی کرتے ہوئے دو حملہ آوروں کو فائرنگ کے تبادلے میں ہلاک کر دیا۔ 

فوج کے مطابق تین شدت پسند کالج کے انتظامی بلاک میں داخل ہونے میں کامیاب ہوئے جنہیں فورسز نے عمارت کے اندر محصور کر رکھا ہے اور علاقے میں کلیئرنس آپریشن جاری ہے۔

مقامی پولیس حکام کا کہنا ہے کہ دھماکے کے نتیجے میں کالج کے آس پاس کے رہائشی علاقوں میں بھی جھٹکے محسوس کیے گئے، جبکہ قریب کے مکانات اور دکانوں کو نقصان پہنچا۔ پولیس کے مطابق واقعے میں 10 عام شہری زخمی ہوئے جنہیں قریبی ہسپتال منتقل کیا گیا ہے۔

آئی ایس پی آر نے دعویٰ کیا ہے کہ حملہ آور افغانستان میں موجود اپنے ’ہینڈلرز‘ سے رابطے میں تھے۔ فوج کے مطابق یہ واقعہ سابقہ قبائلی اضلاع کے نوجوانوں کی تعلیم اور معمول کی زندگی کو نشانہ بنانے کی کوشش ہے۔ بیان میں کہا گیا ہے کہ پاکستان افغانستان میں موجود شدت پسندوں کے خلاف کارروائی کا حق محفوظ رکھتا ہے۔

فوج نے مزید کہا کہ علاقے میں ’کلیئرنس آپریشن‘ جاری ہے اور ان شدت پسندوں کی پشت پناہی کرنے والے عناصر کو بھی نشانہ بنایا جائے گا۔