حب : مسافر کوچ اور ٹرک میں خوفناک تصادم، 25 افراد جل کر جاں بحق، متعدد زخمی

حب + کوئٹہ ( ڈیلی اردو ) بلوچستان کے ضلع حب کے قریب بیلا کراس میں مسافر کوچ اور ٹرک میں تصادم کے نتیجے میں 25 افراد جھلس کر جاں بحق ہو گئے، حادثے کے بعد کوچ میں آگ لگ گئی تھی، زخمیوں کی حالت انتہائی تشویشناک ہے۔

تفصیلات کے مطابق بلوچستان میں حب بیلا کراس کے قریب مسافر کوچ اور ٹرک میں تصادم کے نتیجے میں 25 افراد جھلس کر جاں بحق اور متعدد زخمی ہوگئے۔

تصادم کے بعد مسافر کوچ اور آئل ٹینکر میں آگ بھڑک اٹھی تھی، جس کے نتیجے میں 15 افراد موقع پر جاں بحق اور 16 زخمی ہوگئے تھے۔

جاں بحق ہونے والوں میں خواتین اور بچے بھی شامل ہیں۔ زخمیوں اور لاشوں کو مقامی ہسپتال منتقل کیا گیا جہاں جھلس کر زخمی ہونے والے 5 افراد زخموں کی تاب نہ لاتے ہوئے چل بسے۔

ڈپٹی کمشنر شبیر مینگل کا کہنا ہے کہ 4 شدید زخمیوں کو بیلہ ہسپتال سے کراچی روانہ کر دیا گیا۔ ڈی سی نے مزید کہا کہ بس میں 29 مسافروں سمیت 31 افراد سوار تھے۔ حادثےکا شکار ہونے والی کوچ کراچی سے پنجگور جارہی تھی۔ ڈٖی سی لسبیلہ کا کہنا ہے کہ گاڑیوں میں لگنے والی آگ پر قابو پالیا ہے۔