حمدان کو جبری گمشدگی کے بعد جعلی پولیس مقابلے میں مار دیا گیا، لواحقین

کراچی (ڈیلی اردو) بلوچ لاپتہ افراد کے لواحقین نے گولیمار کے رہائشی نوجوان حمدان کے مبینہ پولیس مقابلے کو جعلی قرار دیتے ہوئے الزام عائد کیا ہے کہ انہیں جبری گمشدگی کے بعد قتل کیا گیا اور اب ان کی لاش ورثا کے حوالے نہیں کی جا رہی۔

بدھ کے روز اہلخانہ اور شہریوں کی بڑی تعداد نے کراچی پریس کلب کے باہر احتجاج کیا اور بعد ازاں پریس کانفرنس سے خطاب کیا۔

اہل خانہ کے مطابق حمدان بلوچ کو 29 دسمبر 2025 کو سی ٹی ڈی اہلکاروں نے دھوبی گھاٹ پل کے قریب سے بغیر کسی وارنٹ کے حراست میں لیا، جس کے بعد وہ لاپتہ ہو گئے۔ ان کا کہنا تھا کہ یہ واضح جبری گمشدگی کا واقعہ تھا۔

بعد ازاں 6 جنوری 2026 کو سندھ پولیس کے کاؤنٹر ٹیررازم ڈیپارٹمنٹ سندھ نے ایک پریس کانفرنس میں دعویٰ کیا کہ حمدان کو رئیس گوٹھ سے ایک مسلح تنظیم سے تعلق اور سہولت کاری کے شبے میں گرفتار کیا گیا تھا۔

لواحقین نے بتایا کہ منگل کے روز سی ٹی ڈی کی جانب سے جاری اعلامیے میں کہا گیا کہ حمدان بلوچ ایک مبینہ مقابلے میں ہلاک ہوا اور وہ اپنے ہی ساتھیوں کی فائرنگ کا نشانہ بنا۔ اہلخانہ نے اس مؤقف کو مسترد کرتے ہوئے کہا کہ ماضی میں بھی اسی نوعیت کے بیانات دے کر واقعات کو چھپانے کی کوشش کی جاتی رہی ہے۔

یاد رہے کہ منگل کو سی ٹی ڈی نے دعویٰ کیا تھا کہ کراچی میں ایک مبینہ مقابلے میں کالعدم بلوچ لبریشن آرمی (بی ایل اے) بشیر زیب گروپ سے تعلق رکھنے والے چار مشتبہ شدت پسند ہلاک ہوئے۔

اہلخانہ کے مطابق انہوں نے لاش کی شناخت کر لی ہے تاہم ایدھی فاؤنڈیشن حکام کا کہنا ہے کہ سی ٹی ڈی کی اجازت کے بغیر میت ورثا کے حوالے نہیں کی جا سکتی، جبکہ متعلقہ حکام مختلف حیلے بہانوں سے معاملہ مؤخر کر رہے ہیں۔

پریس کانفرنس میں موجود بلوچ یکجہتی کمیٹی کی رہنما فوزیہ بلوچ نے کہا کہ وہ اس معاملے پر خاموش نہیں رہیں گے۔ ان کا کہنا تھا کہ پہلے جبری گمشدگی، پھر دہشت گردی کے الزامات اور آخر کار مبینہ جعلی مقابلہ، یہ سب اقدامات قانون سے بالاتر دکھائی دیتے ہیں۔

انہوں نے مطالبہ کیا کہ واقعے میں ملوث سی ٹی ڈی افسران اور اہلکاروں کے خلاف مقدمہ درج کیا جائے اور حمدان بلوچ کی لاش کا فوری اور شفاف پوسٹ مارٹم کرایا جائے تاکہ حقائق سامنے آسکیں۔ مظاہرین نے خبردار کیا کہ اگر مطالبات منظور نہ کیے گئے تو احتجاج کا دائرہ وسیع کیا جائے گا۔