حوثی باغیوں کا سعودی عرب میں فوجی تنصیبات پر میزائل اور ڈرون حملوں کا دعویٰ

صنعاء (ڈیلی اردو) یمن کے حوثی باغیوں نے دعویٰ کیا ہے کہ انہوں نے سعودی عرب کے جنوبی شہر خمیس مشیط میں واقع شاہ خالد ایئر بیس کو بیلسٹک میزائلوں اور ڈرونز کے ذریعے نشانہ بنایا ہے۔

حوثی باغیوں کے فوجی ترجمان یحییٰ سریع کے مطابق کارروائی میں درجنوں میزائل اور بغیر پائلٹ طیارے استعمال کیے گئے۔ ان کا کہنا تھا کہ حملے میں ایئر بیس پر موجود جنگی طیاروں کے ہینگرز، ریڈار نظام، رن ویز، اسلحہ و گولہ بارود کے ذخائر اور دیگر فوجی تنصیبات کو نشانہ بنایا گیا۔

ترجمان نے دعویٰ کیا کہ حملے کے اہداف پر براہ راست اور درست انداز میں ضرب لگائی گئی اور سعودی فوجی اڈے کو بھاری نقصان پہنچا، تاہم انہوں نے نقصان کی نوعیت یا جانی نقصانات سے متعلق کوئی تفصیلات فراہم نہیں کیں۔

یحییٰ سریع نے دعویٰ کیا کہ یہ کارروائی یمن میں سعودی فضائی حملوں کے ردعمل میں کی گئی۔ ان کے مطابق گزشتہ پانچ روز کے دوران یمن کے مختلف علاقوں میں 300 سے زائد فضائی حملے کیے گئے، جن میں ایف 15 اور ٹائفون طیارے استعمال ہوئے۔

حوثی ترجمان نے مزید حملوں کی دھمکی دیتے ہوئے کہا کہ یمن میں کارروائیاں جاری رہنے کی صورت میں سعودی عرب کے اندر مزید وسیع حملے کیے جائیں گے۔

دوسری جانب سعودی سول ڈیفنس نے رات کے وقت ابہا، خمیس مشیط، نجران اور جازان کے علاقوں میں مختصر دورانیے کے انتباہات جاری کیے۔ تاہم سعودی حکام کی جانب سے حوثی باغیوں کے میزائل اور ڈرون حملے میں ہونے والے نقصان کی تفصیلی تصدیق سامنے نہیں آئی۔