خوست میں بارودی گولہ پھٹنے سے دو بچے ہلاک، ایک بچی شدید زخمی

کابل(ڈیلی اردو)افغانستان کے صوبہ خوست میں جنگی باقیات میں شامل ایک غیر پھٹا ہوا گولہ بچوں کے لیے جان لیوا ثابت ہوگیا، دھماکے کے نتیجے میں ایک 10 سالہ لڑکے اور ایک بچی کی ہلاکت جبکہ ایک اور بچی کے شدید زخمی ہونے کی اطلاع ہے۔

مقامی ذرائع کے مطابق واقعہ خوست کے علاقے نمرو میں پیش آیا، جہاں بچوں کو مبینہ طور پر زمین سے ایک غیر منفجرہ گولہ ملا۔ بچے اس کے ساتھ کھیل رہے تھے کہ اچانک دھماکا ہوگیا۔

ذرائع کا کہنا ہے کہ واقعے میں متاثر ہونے والی دونوں بچیوں کی عمریں تقریباً 10 سے 12 سال کے درمیان ہیں۔ زخمی بچی کو تشویشناک حالت میں طبی امداد کے لیے منتقل کیے جانے کی اطلاعات ہیں۔

افغانستان کے مختلف علاقوں میں گزشتہ کئی دہائیوں کے دوران ہونے والی لڑائیوں کے نتیجے میں بڑی تعداد میں بارودی سرنگیں اور غیر پھٹے ہوئے گولہ بارود موجود ہیں، جو بالخصوص بچوں اور دیہی آبادی کے لیے مسلسل خطرہ بنے ہوئے ہیں۔

رواں برس بھی ملک کے مختلف علاقوں میں بارودی سرنگوں اور جنگی باقیات کے دھماکوں سے شہریوں کے ہلاک و زخمی ہونے کے واقعات رپورٹ ہوتے رہے ہیں۔