خیبر : باڑہ میں سکیورٹی فورسز کا انٹیلی جنس آپریشن، مطلوب ٹارگٹ کلر ہلاک

خیبر(ڈیلی اردو) خیبرپختونخواہ کے شورش زدہ ضلع خیبر کے علاقے باڑہ بازار میں سکیورٹی فورسز نے انٹیلی جنس معلومات کی بنیاد پر کارروائی کرتے ہوئے متعدد سنگین مقدمات میں مطلوب مبینہ ٹارگٹ کلر یار محمد کو ہلاک کردیا۔

ذرائع کے مطابق انٹیلی جنس اداروں نے باڑہ بازار میں مینار مسجد کے قریب مشتبہ شخص کی موجودگی کی اطلاع پر کارروائی کی۔ آپریشن کے دوران سکیورٹی فورسز نے مطلوب شخص کو نشانہ بنایا، جس کے نتیجے میں وہ ہلاک ہوگیا۔

ذرائع نے ہلاک ہونے والے شخص کی شناخت یار محمد ولد جان محمد کے نام سے کی ہے، جو پشاور کے شیخان کلے کا رہائشی بتایا جاتا ہے۔ ابتدائی اطلاعات کے مطابق یار محمد متعدد سنگین جرائم اور ٹارگٹ کلنگ کے مختلف واقعات میں مبینہ طور پر مطلوب تھا۔

سکیورٹی اداروں کی جانب سے علاقے میں ٹارگٹ کلنگ، دہشتگردی اور دیگر پرتشدد سرگرمیوں میں ملوث عناصر کے خلاف انٹیلی جنس بنیادوں پر کارروائیاں جاری ہیں۔ تاہم یار محمد کے خلاف درج مقدمات، اس کے ممکنہ ساتھیوں یا کسی تنظیم سے وابستگی کے حوالے سے مزید تفصیلات فوری طور پر سامنے نہیں آسکیں۔