خیبر: تاجر رہنما شیر محمد آفریدی اور ابرار آفریدی کے ہلاکت میں کون ملوث؟

باڑہ + اسلام آباد (نمائندہ ڈیلی اردو/ٹی این این) پاکستان کے قبائلی ضلع خیبر کی دور افتادہ وادی تیراہ کے علاقے نیو باغ میں تاجر ایسوسی ایشن کے صدر حاجی شیر محمد آفریدی اور ان کے چچازاد بھائی ابرار خان کو شدت پسندوں نے گولیاں مار کر ہلاک دیا گیا ہے۔ دونوں کی لاشیں آج بھوٹان شریف کے علاقے سے برآمد ہوئیں۔ دونوں افراد کو تقریباً ایک ہفتہ قبل کالعدم تحریک طالبان ہاکستان کے شدت پسندوں نے تحصیل باڑہ کے علاقے میدان سے اغواء کیا تھا۔

پولیس کی تصدیق

پولیس نے اس واقعے کی تصدیق کی ہے اور بتایا کہ 30 جنوری 2025 کو صبح کے وقت حاجی شیر محمد آفریدی اور ابرار خان آفریدی کو طالبان نے اغواء کر لیا تھا۔ مقامی سطح پر ان کی بازیابی کے لئے متعدد کوششیں کی گئیں، جن میں جرگہ اور مذاکرات شامل تھے، تاہم یہ تمام کوششیں بے سود ثابت ہوئیں۔

پولیس حکام کا کہنا ہے کہ چونکہ یہ واقعہ ایک دور افتادہ علاقے میں پیش آیا ہے، اس لئے مکمل تفصیلات آنے میں کچھ وقت لگ سکتا ہے۔ تاہم، یہ تصدیق ہو چکی ہے کہ برآمد ہونے والی لاشیں وہی مغوی افراد کی ہیں۔

سکیورٹی فورسز کا موقف

سکیورٹی ذرائع کے مطابق ضلع خیبر نیو باغ میں کالعدم تنظیم کے شدت پسندوں نے حاجی شیر محمد اور ابرار کو گزشتہ دنوں اغوا کرنے کے بعد ہلاک کردیا۔

ذرائع فورسز نے صحافیوں کو بتایا کہ مقتولین کی لاشیں تاحال کالعدم تنظیم کی تحویل میں ہیں۔

مقامی صحافی نے خبر رساں ایجنسی ٹی این این کو بتایا کہ مغوی صدر حاجی شیر محمد آفریدی اور ان کے ساتھی گزشتہ ایک ہفتہ سے اغواء کاروں کی تحویل میں تھے، اور ان کی بازیابی کے لئے مقامی سطح پر کئی کوششیں کی گئیں، مگر اغوا کاروں کی شناخت اور ان کے مقاصد کا کچھ پتہ نہ چل سکا۔

صحافی نے مزید کہا کہ ان کی رہائی کے لئے کسی قسم کا تاوان طلب نہیں کیا گیا اور نہ ہی کسی قسم کی ڈیل کی بات سامنے آئی۔

انکا کہنا ہے کہ اس اندوہناک واقعے کے بعد وادی تیراہ اور اس کے ملحقہ علاقے باڑہ پلین میں سوگ کی فضا پھیل گئی ہے، اور مکینوں میں خوف و ہراس کی لہر دوڑ گئی ہے۔ تاجر برادری نے اس واقعہ کو علاقے کے لئے ناقابل تلافی نقصان قرار دیا ہے۔

خیبر سے رکن قومی اسمبلی حاجی اقبال آفریدی نے فیس بک پر اپنے بیان میں کہا کہ “وادی تیراہ میں تاجر ایسوسی ایشن کے صدر حاجی شیر محمد آفریدی کو شہید کر دیا گیا ہے، اللہ تعالی مرحوم کی مغفرت فرمائیں، ہم غمزدہ خانہ دان کے غم میں برابر کے شریک ہیں۔”

ٹی ٹی پی کا وضاحتی بیان

دوسری جانب تحریک طالبان پاکستان کے محمد خراسانی ترجمان نے وضاحتی بیان جاری کرتے ہوئے کہا ہے کہ شیر محمد خان کو چند دن قبل ٹی ٹی پی کے مجاہدین نے ضلع خیبر کے والی” قاری اسماعیل” کے ہلاکت کے الزام میں گرفتار کیا تھا۔

ترجمان کے مطابق ٹی ٹی پی کے انٹلیجنس ادارے “ٹی آئی اے” نے معلومات اور تحقیق مرکزی دار الافتاء کے عمومی رئیس کو ارسال کرکے ملزم کا حکم طلب کیا، رئیس دار الافتاء نے ارسال کردہ تحقیق کی بناء پر ملزم کو کسی بھی قسم کی سزاء یا قتل سے بری قرار دیتے ہوئے اسکی رہائی کا حکم صادر کیا۔

ترجمان نے دعوی کیا ہے کہ رہائی کا حکم صادر ہونے کے بعد بعض عناصر نے موقع پاکر شیر محمد خان اور اسکے ڈرائیور کو رہائی سے کچھ دیر قبل از خود ہلاک کر دیا۔

لشکر اسلام کا بیان

آدھر کالعدم تحریک لشکر اسلام پاکستان کے ترجمان صلاح الدین ایوبی نے اپنے جاری کردہ بیان میں دعویٰ کیا گیا ہے کہ اس قاتلانہ حملہ سے کوئی تعلق نہیں ہے. ہمارا پالسی عوام کے خلاف لڑنا نہیں ہے بلکہ فوج کے خلاف ہماری جنگ نفاذ شریعت قائم ہونے تک جاری رہے گا۔