خیبر میں سرکاری اسکول کے استاد کی ٹارگٹ کلنگ

خیبر (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع خیبر کے علاقے باڑہ میں نامعلوم مسلح افراد کی فائرنگ کے نتیجے میں ایک سرکاری اسکول کے ٹیچر ہلاک ہوگئے۔

پولیس کے مطابق واقعہ گورنمنٹ ہائی اسکول جان خان کلے برقمبر خیل کے مرکزی گیٹ کے سامنے پیش آیا، جہاں کمپیوٹر ٹیچر مسافر شاہ کو موٹر سائیکل سوار نامعلوم ملزمان نے نشانہ بنایا۔

پولیس کی ابتدائی رپورٹ کے مطابق واقعے کو ٹارگٹ کلنگ قرار دیا جا رہا ہے۔

فائرنگ کے نتیجے میں وہ موقع پر ہی دم توڑ گئے جبکہ ملزمان جائے وقوعہ سے فرار ہونے میں کامیاب ہوگئے۔

واقعے کے بعد پولیس نے موقع پر پہنچ کر شواہد اکٹھے کر لیے اور تفتیش کا آغاز کر دیا ہے۔ لاش کو قانونی کارروائی اور ضروری مراحل کے لیے قریبی اسپتال منتقل کر دیا گیا ہے۔

پولیس حکام کا کہنا ہے کہ واقعے کی مختلف زاویوں سے تحقیقات جاری ہیں اور ملزمان کی گرفتاری کے لیے کارروائیاں تیز کر دی گئی ہیں۔

دوسری جانب علاقہ مکینوں نے واقعے پر شدید تشویش کا اظہار کرتے ہوئے مطالبہ کیا ہے کہ ملوث افراد کو جلد گرفتار کرکے قانون کے مطابق کارروائی کی جائے۔