خیبر پختونخوا اور بلوچستان کے تاجروں کا سیکیورٹی بحران پر وزیر داخلہ سے اہم ملاقات

اسلام آباد (ڈیلی اردو) وفاقی وزیر داخلہ محسن نقوی سے خیبر پختونخوا اور بلوچستان کے تاجروں اور صنعت کاروں کے وفد نے ملاقات کی، جس میں دونوں صوبوں میں موجودہ سیکیورٹی صورتحال، کاروباری مشکلات اور دیگر درپیش مسائل پر تفصیلی گفتگو کی گئی۔

ملاقات میں خیبر پختونخوا اور بلوچستان کے تمام چیمبرز آف کامرس کے نمائندوں نے شرکت کی اور اپنے علاقوں میں درپیش سیکیورٹی چیلنجز، کاروباری سرگرمیوں میں رکاوٹوں اور تاجروں کو درپیش مسائل سے وزیر داخلہ کو آگاہ کیا۔

وفاقی وزیر داخلہ محسن نقوی نے وفد کو ملک بالخصوص خیبر پختونخوا اور بلوچستان میں سیکیورٹی کی مجموعی صورتحال اور حکومت کی جانب سے کیے جانے والے اقدامات سے آگاہ کیا۔

محسن نقوی نے تاجروں اور صنعت کاروں کو مکمل تعاون کی یقین دہانی کراتے ہوئے کہا کہ حکومت کاروباری برادری کے مسائل کے حل اور ان کے تحفظ کے لیے تمام ممکنہ وسائل بروئے کار لائے گی۔

وزیر داخلہ کا کہنا تھا کہ حکومت کی ترجیح ہے کہ تاجروں اور صنعت کاروں کو ایک محفوظ، پرامن اور سازگار کاروباری ماحول فراہم کیا جائے، کیونکہ ملکی معیشت کے استحکام میں نجی شعبے کا کردار انتہائی اہم ہے۔

انہوں نے کہا کہ وہ جلد پشاور اور کوئٹہ کا دورہ کریں گے، جہاں متعلقہ صوبائی حکومتوں کے اعلیٰ حکام اور نمائندوں کی موجودگی میں تاجروں کے ساتھ مزید تفصیلی ملاقاتیں کی جائیں گی تاکہ درپیش مسائل کا مستقل اور عملی حل نکالا جا سکے۔

محسن نقوی نے کہا کہ کاروباری برادری کی ترقی میں ہی پاکستان کی ترقی پوشیدہ ہے۔ ان کا کہنا تھا کہ پوری حکومت تاجروں کے ساتھ کھڑی ہے اور ان کے جائز مسائل کے حل کے لیے اقدامات کیے جائیں گے۔

ملاقات کے دوران تاجروں نے سیکیورٹی صورتحال میں بہتری، کاروباری سرگرمیوں کے فروغ اور سرمایہ کاری کے لیے سازگار ماحول کی ضرورت پر بھی زور دیا۔