خیبر پختونخوا میں دہشتگردی میں اضافے پر وزیراعلیٰ سہیل آفریدی کی خارجہ پالیسی پر تنقید

پشاور(ڈیلی اردو) وزیراعلیٰ خیبر پختونخوا سہیل آفریدی نے صوبے میں بڑھتے دہشتگردی کے واقعات پر تشویش کا اظہار کرتے ہوئے موجودہ خارجہ پالیسی کو تنقید کا نشانہ بنایا ہے۔ ان کا کہنا ہے کہ گزشتہ کئی برس سے اختیار کی جانے والی پالیسی مطلوبہ نتائج دینے میں ناکام رہی ہے اور اس میں تبدیلی کی ضرورت ہے۔

وزیراعلیٰ نے یہ بات کوہاٹ کے دورے کے دوران کہی، جہاں انہوں نے پولیس لائنز کے حالیہ دہشتگرد حملے میں زخمی ہونے والے اہلکاروں کی اسپتال میں عیادت کی اور متاثرہ خاندانوں سے ملاقات کی۔ انہوں نے واقعے میں جانیں گنوانے والے پولیس اہلکاروں اور شہریوں کے اہلخانہ سے تعزیت بھی کی۔

سہیل آفریدی کے مطابق خیبر پختونخوا اور بالخصوص قبائلی اضلاع نے گزشتہ دو دہائیوں کے دوران دہشتگردی کے باعث بھاری جانی و مالی نقصان اٹھایا ہے۔ ان کا کہنا تھا کہ صوبے میں بدامنی کے ساتھ قبائلی اضلاع کی معاشی صورتحال بھی متاثر ہوئی ہے۔

وزیراعلیٰ نے مؤقف اختیار کیا کہ ایسے فیصلے جو عوامی اور زمینی صورتحال کو مدنظر رکھے بغیر کیے جائیں، دیرپا امن کے حصول میں مؤثر ثابت نہیں ہوسکتے۔ ان کے بقول اگر موجودہ پالیسی مطلوبہ نتائج نہیں دے رہی تو اس پر نظرثانی ضروری ہے۔

سہیل آفریدی نے کہا کہ ان کی جماعت کی جانب سے پیش کی جانے والی تجاویز کا مقصد کسی سیاسی جماعت کو فائدہ پہنچانا نہیں بلکہ خیبر پختونخوا سمیت پورے ملک میں امن اور استحکام لانا ہے۔ انہوں نے دعویٰ کیا کہ اگر ان کی تجویز کردہ پالیسی پر عمل کیا جائے تو مختصر مدت میں امن کے قیام کی جانب پیش رفت ممکن ہے۔

وزیراعلیٰ نے کوہاٹ پولیس لائنز حملے کے بعد کارروائی میں حصہ لینے والے پولیس، انسداد دہشتگردی محکمے، اسپیشل برانچ، ریسکیو 1122، ڈاکٹروں، ضلعی انتظامیہ اور مقامی شہریوں کے کردار کو بھی سراہا۔

واضح رہے کہ کوہاٹ پولیس لائنز میں 18 ستمبر کو خودکش حملے کے بعد مسلح دہشتگردوں نے پولیس کمپاؤنڈ میں داخل ہونے کی کوشش کی تھی۔ حکام کے مطابق بعد ازاں کلیئرنس آپریشن مکمل کیا گیا اور حملے میں ہلاک افراد کی تعداد کے حوالے سے مختلف اوقات میں مختلف اعداد سامنے آئے۔