خیبر کی وادی تیراہ میں سکیورٹی فورسز کی کارروائی، 4 دہشتگرد ہلاک، 8 زخمی

خیبر(ڈیلی اردو) خیبرپختونخواہ کے شورش زدہ ضلع خیبر کی وادی تیراہ کے علاقے اکاخیل میں سکیورٹی فورسز کی انٹیلی جنس بنیاد پر کارروائی کے دوران 4 دہشتگرد ہلاک اور 8 زخمی ہوگئے۔ سکیورٹی ذرائع کے مطابق ہلاک ہونے والوں میں حبیب آفریدی شلوبر بھی شامل ہے، جس کا تعلق باڑہ سے بتایا جاتا ہے۔

ذرائع کے مطابق سکیورٹی فورسز نے علاقے میں دہشتگردوں کی موجودگی کی خفیہ اطلاع ملنے پر کارروائی کی۔ اہلکاروں کی آمد کا علم ہونے پر دہشتگردوں نے فائرنگ شروع کردی، جس کے بعد فائرنگ کا تبادلہ ہوا۔ کارروائی کے دوران 4 دہشتگرد ہلاک جبکہ 8 زخمی ہوئے۔

واقعے کے بعد سکیورٹی فورسز نے علاقے کو گھیرے میں لے کر فرار ہونے والے دیگر دہشتگردوں کی تلاش کے لیے سرچ آپریشن شروع کردیا۔ ذرائع کے مطابق باقی ماندہ دہشتگردوں کا تعاقب جاری ہے، جبکہ ہلاک اور زخمی ہونے والے دیگر افراد کی شناخت سے متعلق مزید تفصیلات سامنے نہیں آئیں۔