خیبرپختونخوا اور بلوچستان میں سیکیورٹی فورسز کی کارروائیاں، 11 دہشتگرد ہلاک

پشاور(ڈیلی اردو) خیبرپختونخوا اور بلوچستان میں سیکیورٹی فورسز کی مختلف کارروائیوں کے دوران 11 دہشتگرد ہلاک جبکہ ان کے قبضے سے بڑی مقدار میں اسلحہ اور گولہ بارود برآمد کیے جانے کا دعویٰ کیا گیا ہے۔

سیکیورٹی ذرائع کے مطابق جنوبی وزیرستان میں انٹیلی جنس بنیادوں پر کی گئی کارروائی کے دوران 5 دہشتگرد ہلاک ہوئے۔ فورسز نے مبینہ دہشتگردوں کے ٹھکانوں کو نشانہ بنایا، جس کے نتیجے میں متعدد ٹھکانے تباہ کردیے گئے۔

ذرائع کا کہنا ہے کہ کارروائی کے بعد ہلاک دہشتگردوں کے قبضے سے بڑی مقدار میں اسلحہ اور گولہ بارود بھی برآمد کیا گیا۔ علاقے میں دہشتگردوں کے خلاف انٹیلی جنس بنیادوں پر مزید کارروائیاں جاری رہنے کی اطلاعات ہیں۔

دوسری جانب بلوچستان کے علاقوں گورندر اور ماشکیل میں سیکیورٹی فورسز کی کارروائیوں کے دوران مزید 6 دہشتگرد ہلاک ہونے کا بتایا گیا ہے۔ سیکیورٹی ذرائع کے مطابق ماشکیل میں دہشتگردوں نے ایک سیکیورٹی چیک پوسٹ پر فائرنگ کی اور بعد ازاں فرار ہونے کی کوشش کی، تاہم فورسز نے کارروائی کرتے ہوئے انہیں ہلاک کردیا۔

ذرائع کے مطابق بلوچستان میں ہلاک ہونے والے دہشتگردوں کا تعلق ایک مسلح گروہ سے بتایا گیا ہے، تاہم ان کی شناخت اور کارروائی سے متعلق مزید تفصیلات سامنے نہیں آئی ہیں۔

وفاقی وزیر داخلہ محسن نقوی نے خیبرپختونخوا اور بلوچستان میں انٹیلی جنس بنیادوں پر ہونے والی کارروائیوں میں کامیابی پر سیکیورٹی فورسز کو سراہتے ہوئے کہا ہے کہ دہشتگردی کے خلاف جنگ میں قوم سیکیورٹی اداروں کے ساتھ کھڑی ہے۔

انہوں نے کہا کہ سیکیورٹی فورسز کے اہلکار ملک کے دفاع اور امن کے لیے قربانیاں دے رہے ہیں اور دہشتگردی کے خاتمے کے لیے کارروائیاں جاری رکھی جائیں گی۔