خیبرپختونخوا پولیس میں 17 ہزار اہلکاروں کی کمی، دہشتگردی کے خلاف جنگ میں 4 ہزار سے زائد اہلکار ہلاک

پشاور(ڈیلی اردو) خیبرپختونخوا پولیس کو افرادی قوت اور بنیادی وسائل کی کمی کا سامنا ہے، جبکہ دہشتگردی کے خلاف طویل جنگ کے دوران دو ایڈیشنل انسپکٹر جنرلز سمیت 4 ہزار سے زائد پولیس اہلکار ہلاک ہوچکے ہیں۔

پولیس کی ایک رپورٹ کے مطابق صوبے میں افسران اور اہلکاروں کی مجموعی کمی تقریباً 17 ہزار ہے۔ رپورٹ میں بتایا گیا ہے کہ پولیس کی دستیاب نفری میں سے تقریباً 13 ہزار 500 اہلکار سیاسی شخصیات اور دیگر اہم افراد کی سیکیورٹی پر تعینات ہیں، جس کے باعث دہشتگردی کے خلاف کارروائیوں اور معمول کی پولیسنگ کے لیے دستیاب نفری مزید محدود ہوجاتی ہے۔

رپورٹ کے مطابق رواں ماہ اب تک 25 سے زائد پولیس اہلکار دہشتگردی کے مختلف واقعات میں ہلاک ہوچکے ہیں، جبکہ 2026 کے دوران اب تک 220 سے زائد سیکیورٹی اہلکاروں کی ہلاکت کی اطلاعات سامنے آئی ہیں۔

دستاویز میں خیبرپختونخوا کے کاؤنٹر ٹیررازم ڈیپارٹمنٹ (سی ٹی ڈی) کو درپیش وسائل اور تکنیکی سہولیات کی کمی کی بھی نشاندہی کی گئی ہے۔ رپورٹ کے مطابق دہشتگردی سے متعلق تحقیقات میں ضروری ڈیٹا اور فرانزک معاونت کے لیے سی ٹی ڈی کو پنجاب کی ڈیٹا فرانزک لیبارٹری پر انحصار کرنا پڑتا ہے۔

رپورٹ میں بتایا گیا ہے کہ محدود وسائل کے باعث صوبائی سی ٹی ڈی کے پاس اس وقت صرف 17 بلٹ پروف گاڑیاں اور 25 مستقل اہلکار موجود ہیں، جس سے دہشتگردی کے خلاف کارروائیوں اور تحقیقات کی استعداد متاثر ہونے کا خدشہ ظاہر کیا گیا ہے۔

میڈیا رپورٹس کے مطابق قبائلی اضلاع میں پولیس کا کمزور انفرااسٹرکچر بھی ایک بڑا چیلنج ہے، جہاں سیکیورٹی فورسز کو مبینہ دہشتگردوں کی جانب سے بارودی مواد اور کواڈ کاپٹرز کے ذریعے کیے جانے والے حملوں کا سامنا ہے۔

پولیس رپورٹ میں دہشتگردی سے نمٹنے کے لیے پولیس اور سی ٹی ڈی کی افرادی قوت میں اضافے، جدید وسائل اور فرانزک سہولیات کی فراہمی، قبائلی اضلاع میں انفرااسٹرکچر بہتر بنانے اور اداروں کی مجموعی استعدادِ کار بڑھانے پر زور دیا گیا ہے۔