راولپنڈی اور حسن ابدال میں ٹی ٹی پی کے 4 دہشت گرد گرفتار

اسلام آباد (ک م) پاکستان کے حساس ادارے نے کالعدم تحریک طالبان پاکستان (ٹی ٹی پی) کے چار سہولت کاروں کو گرفتار کر لیا ہے۔ 

حکام کے مطابق گرفتار ملزمان نے 11 اگست کو راولپنڈی اور حسن ابدال میں کارروائیوں کی دھمکی دیتے ہوئے ایک ویڈیو بھی بنائی تھی، جو بعد میں سوشل میڈیا پر وائرل ہو گئی۔ ویڈیو بنانے کے لیے استعمال کی گئی گاڑی بھی برآمد کر لی گئی ہے۔

گرفتار ملزمان کے خلاف مقدمہ درج کر کے قانون کے مطابق کارروائی کی جائے گی۔ حساس ادارے کی یہ کارروائی فتنہ خوارج کے خلاف جاری کارروائیوں کا حصہ ہے، جس کا مقصد ملک میں دہشت گرد تنظیموں کے نیٹ ورک کو توڑنا اور ان کی سرگرمیوں کو ناکام بنانا ہے۔

یاد رہے کہ جنوری کے مہینے میں بھی پاکستانی طالبان کی جانب سے پنجاب میں نوجوانوں کی آن لائن بھرتی مہم کا انکشاف ہوا تھا۔ اس موقع پر قانون نافذ کرنے والے اداروں نے بروقت کارروائی کرتے ہوئے نیٹ ورک کے 6 ملزمان کو گرفتار کر لیا تھا۔ لاہور میں کی گئی کارروائی کے دوران ٹی ٹی پی کی آن لائن بھرتیوں کا نیٹ ورک ختم کرنے کا دعویٰ کیا گیا اور تفصیلات وزیر اعلیٰ پنجاب مریم نواز کو بھی بھجوائی گئی تھیں۔

وزیراعلیٰ کو بھیجی گئی رپورٹ کے مطابق کالعدم تنظیم نے گوجرانوالہ، لاہور، ساہیوال، بہاولپور، جہلم اور سرگودھا سے بھرتیاں کی تھیں، جن کا مقصد پنجاب میں مقامی سہولت کاری کے لیے نیٹ ورک بنانا تھا۔

حکام نے کہا ہے کہ قانون نافذ کرنے والے ادارے ملک میں دہشت گردی کے ہر ممکن خطرے کا بروقت تدارک کرتے رہیں گے اور دہشت گردوں کی سرگرمیوں کو ناکام بنانے کے لیے مربوط اقدامات جاری رکھیں گے۔