رحیم یارخان: بی ایل اے کمانڈر کا علاج کرنے پر 2 ڈاکٹرز سمیت 6 افراد گرفتار

رحیم یار خان (ڈیلی اردو رپورٹ)  پاکستان کے صوبہ پنجاب کے ضلع رحیم یارخان کے ایک نجی ہسپتال میں کالعدم بلوچ لبریشن آرمی کے کمانڈر کا علاج کرنے کے الزام پر ڈاکٹرز و دیگر طبی عملے سمیت 6 افراد کو گرفتار کر لیا گیا۔

ڈیلی اردو کے مطابق صادق آباد میں سول اسپتال کے سرجن ڈاکٹر راؤ ندیم اور ڈاکٹر عثمان کو پولیس نے گرفتار کرلیا۔

پولیس کے مطابق اسپتال کے ڈاکٹرز نے بلوچستان سے تعلق رکھنے والے ایک دہشت گرد فاروق کمانڈر کو زخمی ہونے پر اس کا علاج کیا تھا، ڈاکٹروں نے دہشت گرد کے علاج معالجے اور اسپتال میں داخلے کا ریکارڈ ظاہر نہیں کیا۔

پولیس کے مطابق، گرفتاری کے دوران اسپتال کے عملے نے مزاحمت کی اور پولیس اہلکاروں کو تشدد کا نشانہ بھی بنایا۔

 پولیس کے مطابق ڈاکٹرز و طبی عملے کے خلاف دہشت گرد کا ریکارڈ چھپانے کے خلاف مقدمہ تھانہ سٹی صادق آباد میں درج کر لیا گیا ہے۔