رزمک میں سکیورٹی چیک پوسٹ کے قریب گاڑی دھماکے کا شکار، ایک شخص ہلاک

شمالی وزیرستان(ڈیلی اردو) سب ڈویژن رزمک کے علاقے شوالی زیارت میں ناز میری سکیورٹی چیک پوسٹ کے قریب ایک مقامی گاڑی کو مبینہ طور پر نصب آئی ای ڈی کے ذریعے نشانہ بنایا گیا، جس کے نتیجے میں گاڑی میں سوار ایک شخص ہلاک ہوگیا۔

پولیس کے مطابق دھماکہ جنوبی اور شمالی وزیرستان کے سنگم پر واقع رزمک سب ڈویژن کے علاقے شوالی زیارت میں پیش آیا۔ ابتدائی اطلاعات کے مطابق دھماکا سڑک کنارے نصب بارودی مواد کے باعث ہوا، تاہم واقعے کی نوعیت کی حتمی تصدیق تحقیقات مکمل ہونے کے بعد ہوگی۔

ذرائع کے مطابق دھماکے میں ہلاک ہونے والے شخص کی شناخت خونہ زار خان ولد مانی خان کے نام سے ہوئی ہے، جبکہ بعض ابتدائی اطلاعات میں مقتول کا نام مانی خان ولد خونظر خان بھی بتایا گیا ہے۔

واقعے کے فوراً بعد پولیس اور سکیورٹی اہلکاروں نے علاقے کو گھیرے میں لے لیا اور جائے وقوعہ سے شواہد اکٹھے کرنے کا عمل شروع کردیا۔ حکام کی جانب سے دھماکے کی نوعیت، بارودی مواد اور واقعے میں ملوث عناصر کے حوالے سے مزید تحقیقات جاری ہیں۔