روس کے حملے میں کییف کا ہزار سالہ مذہبی ورثہ بھی نشانہ بن گیا

کییف (ڈیلی اردو) روسی یوکرینی جنگ میں روس کی طرف سے یوکرین پر پیر 15 جون کے روز کیے گئے وسیع تر فضائی حملوں کے دوران متعدد ریسکیو ورکرز مارے گئے جبکہ کییف میں تاریخی اہمیت کے حامل مذہبی مقامات میں شمار ہونے والا ایک ہزار سالہ پرانا راہب خانہ بھی آگ کے شعلوں کی لپیٹ میں آ گیا۔

یوکرینی دارالحکومت سے موصولہ رپورٹوں کے مطابق اپنے سنہری گنبدوں کی وجہ سے دنیا بھر میں مشہور کییف کا یہ راہب خانہ تقریباﹰ ایک ہزار سال پرانا ہے اور یہ یوکرین میں تاریخی اہمیت کی حامل بیش قیمت مذہبی میراث کا کلیدی حصہ سمجھا جاتا ہے۔

روسی فضائی حملوں کے بعد کییف شہر کے وسط میں ڈورمیشن کیتھیڈرل نامی اس راہب خانے کو آگ کے بلند شعلوں اور گہرے دھوئیں کے بادلوں کی لپیٹ میں دیکھا گیا۔

عرف عام میں کییف کا یہ صدیوں پرانا راہب خانہ ’’غاروں والا راہب خانہ‘‘ کہلاتا ہے۔

نیوز ایجنسی ایسوسی ایٹڈ پریس کے فوٹوگرافروں نے اس آگ کی جو تصاویر بنائیں، ان میں امدادی کارکنوں کو وہاں لگی آگ بجھانے کی کوشش کرتے ہوئے دیکھا جا سکتا تھا، وہ بھی ایسی صورت حال میں جب اس راہب خانے کی مذہبی شخصیات پریشانی کے عالم میں وہاں موجود زیادہ سے زیادہ تاریخی اشیاء کو بچانے کی کوششوں میں مصروف تھیں۔

روس نے یوکرین پر اتوار اور پیر کی درمیانی رات اور پیر کے دن جو وسیع تر نئے فضائی حملے کیے، ان میں شمال مشرقی یوکرین کے شہر خارکیف میں متعدد امدادی کارکن ہلاک ہو گئے۔

کییف کا راہب خانہ عالمی ثقافتی میراث کا حصہ

دارالحکومت کییف میں کیے جانے والے روسی فضائی حملوں کے دوران عام شہریوں کو بڑی تعداد میں اپنی جانیں بچانے کے لیے محفوظ مقامات کی طرف دوڑتے ہوئے دیکھا گیا۔ کییف پر کیے گئے حملوں میں کئی افراد کے زخمی ہونے کی بھی اطلاعات ہیں۔

اسی دوران یورپی یونین کی خارجہ امور کی نگران اعلیٰ ترین عہدیدار کایا کالاس نے کہا کہ کییف کے ہزار سال پرانے راہب خانے، جو اقوام متحدہ کے ادارے یونیسکو کی طرف سے تیار کردہ عالمی ثقافتی میراث سمجھے جانے والے مقامات کی فہرست میں شامل ہے، پر روسی حملہ جنگی جرائم کے زمرے میں آتا ہے۔