ریاض ایئرپورٹ اور سعودی ایئرلائن کے طیارے پر حملے، تین سعودی شہری اور پائلٹ ہلاک

ریاض(ڈیلی اردو) سعودی عرب کے دارالحکومت ریاض کے کنگ خالد انٹرنیشنل ایئرپورٹ اور سعودی ایئرلائن کے ایک مسافر طیارے کو نشانہ بنانے والے دو حملوں میں تین سعودی شہری ہلاک اور مختلف قومیتوں سے تعلق رکھنے والے متعدد افراد زخمی ہوگئے۔ سعودی حکام کے مطابق زخمیوں میں بعض کی حالت تشویشناک ہے، جبکہ حملوں کے نتیجے میں ہوائی اڈے کی تنصیبات اور طیارے کو بھی نقصان پہنچا۔

عرب میڈیا، بالخصوص اسکائی نیوز عربیہ کی رپورٹ کے مطابق، سعودی سول ایوی ایشن اتھارٹی نے جمعے کو جاری بیان میں ہلاکتوں اور زخمیوں کی تصدیق کی۔ دوسری جانب سعودی ایئرلائن نے اپنے پائلٹ حمود علی الکلثامی کی ہلاکت کی اطلاع دی ہے۔ رائٹرز نے بھی باخبر ذرائع کے حوالے سے رپورٹ کیا کہ ایئرپورٹ پر کھڑے سعودی ایئرلائن کے ایک مسافر طیارے کو آگ لگنے سے شدید نقصان پہنچا۔

حکام کے مطابق امدادی ٹیموں اور متعلقہ اداروں نے فوری طور پر کارروائی کرتے ہوئے زخمیوں کو طبی امداد کے لیے اسپتال منتقل کیا۔ سول ایوی ایشن اتھارٹی نے بتایا کہ ایئرپورٹ پر فضائی آپریشن بحال کردیا گیا ہے، تاہم نقصانات کا جائزہ لینے اور مسافروں و عملے کی حفاظت یقینی بنانے کے لیے متعلقہ اداروں کے ساتھ اقدامات جاری ہیں۔

یہ واقعات ایسے وقت پیش آئے جب سعودی وزارتِ دفاع نے اس سے ایک روز قبل اعلان کیا تھا کہ حوثی باغیوں کی جانب سے ریاض کی طرف داغے گئے دو بیلسٹک میزائلوں کو روک کر تباہ کردیا گیا۔ سعودی شہری دفاع کے مطابق ایک میزائل کو فضا میں تباہ کیے جانے کے بعد گرنے والے ملبے سے دارالحکومت میں بچوں کے ایک مرکز اور طبی کلینک کے کمپلیکس کو بھی نقصان پہنچا تھا۔