ریاض ایئرپورٹ کے قریب دھواں اور آگ کے شعلے، پروازوں کا شیڈول متاثر

ریاض(ڈیلی اردو ) سعودی دارالحکومت ریاض میں کنگ خالد انٹرنیشنل ایئرپورٹ کے قریب ہفتے کے روز دھوئیں کے گہرے بادل اور آگ کے شعلے نظر آنے کے بعد علاقے میں تشویش پھیل گئی، جبکہ ایئرپورٹ پر متعدد پروازوں میں تاخیر اور منسوخی کی اطلاعات بھی سامنے آئی ہیں۔

بی بی سی عربی اور خبر رساں ادارے اے ایف پی کے مطابق عینی شاہدین نے ایئرپورٹ کے اطراف دھوئیں کے بادل اٹھتے دیکھے۔ بعض رپورٹس میں ایئرپورٹ کے قریب آرامکو کے ایندھن کے ایک ٹینک میں آگ لگنے کا بھی ذکر کیا گیا ہے، تاہم واقعے کی حتمی وجہ فوری طور پر واضح نہیں ہوسکی۔

رائٹرز کے مطابق ریاض ایئرپورٹ کے اطراف سے دھماکوں جیسی آوازیں بھی سنائی دیں، جبکہ مختلف مقامات سے دھوئیں کے سیاہ بادل اٹھتے دکھائی دیے۔ فائر فائٹرز متاثرہ مقام پر آگ بجھانے میں مصروف رہے۔

دوسری جانب سعودی حکام نے حالیہ ممکنہ حوثی حملوں کے خدشے کے پیش نظر ریاض، جدہ، طائف اور دیگر علاقوں میں سیکیورٹی الرٹس جاری کیے تھے، جنہیں بعد میں بعض مقامات پر واپس لے لیا گیا۔ شہریوں اور مقیم افراد کو احتیاط برتنے اور سرکاری ہدایات پر عمل کرنے کی ہدایت بھی کی گئی۔

سعودی سرکاری خبر رساں ادارے کے مطابق طائف میں ایک ڈرون کو فضا میں روکنے کے بعد اس کا ملبہ گرنے سے ایک شخص ہلاک اور دو افراد زخمی ہوئے تھے، جبکہ بعض عمارتوں اور گاڑیوں کو بھی نقصان پہنچا تھا۔

ریاض میں ایئرپورٹ کے قریب آگ اور دھوئیں کے واقعے کے حوالے سے سعودی حکام کی جانب سے فوری طور پر تفصیلی وضاحت سامنے نہیں آئی، جبکہ واقعے کی نوعیت اور ممکنہ وجہ سے متعلق مزید معلومات کا انتظار ہے۔