ریاض میں متعدد دھماکوں کی آوازیں، حوثیوں کا کنگ خالد ایئرپورٹ پر بیلسٹک میزائل حملے کا دعویٰ

ریاض(ڈیلی اردو) سعودی عرب کے دارالحکومت ریاض میں جمعرات کو متعدد دھماکوں کی آوازیں سنی گئیں، جس کے بعد شہر میں سکیورٹی خدشات کے باعث مختلف اداروں اور سفارتی مشنز نے احتیاطی اقدامات کیے۔

خبر رساں ادارے اے ایف پی کے مطابق ریاض میں موجود بعض سفارت کاروں کو اپنی سفارتی عمارتوں کے اندر رہنے کی ہدایت کی گئی، جبکہ مقامی ذرائع نے بتایا کہ متعدد بین الاقوامی اسکولوں نے بھی حفاظتی انتظامات سخت کر دیے۔ کم از کم ایک اسکول میں بچوں کو احتیاطاً تہہ خانے میں منتقل کیے جانے کی اطلاع ہے۔

کنگ عبداللہ فنانشل ڈسٹرکٹ میں کام کرنے والے افراد کے مطابق بعض کمپنیوں نے اپنے دفاتر خالی کرا لیے، جبکہ ریاض میں موجود امریکی اخبار نیویارک ٹائمز کے ایک صحافی نے بھی وقفے وقفے سے متعدد دھماکوں کی آوازیں سننے کی اطلاع دی۔

دوسری جانب یمن کے حوثی گروہ انصار اللہ نے دعویٰ کیا ہے کہ اس نے ریاض کے کنگ خالد انٹرنیشنل ایئرپورٹ کو بیلسٹک میزائل سے نشانہ بنایا۔ حوثیوں کے مطابق میزائل ہدف تک پہنچا، جس کے نتیجے میں ہوائی اڈے کی سرگرمیاں متاثر ہوئیں۔

تاہم سعودی حکام کی جانب سے حوثیوں کے اس دعوے کی فوری طور پر تصدیق نہیں کی گئی۔ حالیہ دنوں میں سعودی حکام نے شہریوں کو میزائل اور ڈرون حملوں سے متعلق غیر مصدقہ معلومات یا تصاویر شیئر کرنے سے گریز کرنے کی ہدایت بھی کی ہے۔

ریاض میں ہونے والے دھماکوں اور کنگ خالد انٹرنیشنل ایئرپورٹ کو مبینہ طور پر نشانہ بنائے جانے کے واقعے کے پس منظر میں سعودی عرب اور یمن کے حوثیوں کے درمیان کشیدگی میں مزید اضافہ دیکھا جا رہا ہے۔