سانحہ ساہیوال پر وزیر اعلیٰ پنجاب کی خصوصی آمد، قومی خزانے سے لاکھوں روپے خرچ کر دیئے گئے

سانحہ ساہیوال پر وزیر اعلیٰ پنجاب کی خصوصی آمد، قومی خزانے سے لاکھوں روپے خرچ کر دیئے گئے، وزیر اعلیٰ عثمان بزدار کے لیے لاکھوں روپے کی قیمتی بیڈ شیٹ اورغیر ملکی ڈنر سیٹ خریدے گئے

ساہیوال(ڈیلی اردو ) پاکستان تحریک انصاف کی عام انتخابات میں نمایاں کامیابی کے بعد موجودہ حکومت نے کفایت شعاری کی پالیسی اپنانے اور قومی خزانے کے بے دریغ استعمال کو روکنے کے عزم کا اظہار کیا تھا لیکن حکومتی نمائندوں نے حکومت کے ان تمام دعووں کی قلعی کھول کر رکھ دی۔

حال ہی میں وزیر اعلیٰ پنجاب سردار عثمان بزدار نے سانحہ ساہیوال کے زخمی بچوں کی تیمار داری اور متاثرہ خاندان سے اظہار تعزیت کے لیے ساہیوال کا دورہ کیا تھا ، لیکن وزیراعلی پنجاب کا یہ دورہ قومی خزانے کو لاکھوں روپے کا ٹیکہ لگا گیا۔

ذرائع کے مطابق شیڈول کے مطابق وزیر اعلیٰ پنجاب سردار عثمان بزدار نے ضلعی ہیڈ کوارٹر اسپتال میں پریس بریفنگ اور زخمیوں کی عیادت کے لیے آدھا گھنٹہ مخصوص کر رکھا تھا۔ ضلع اور ڈویژن کے اعلی افسران نے سادگی اور انصاف کی دعویدار جماعت پاکستان تحریک انصاف کے وزیر اعلیٰ عثمان بزدار کے لیے لاکھوں روپے مالیتی قیمتی بیڈ شیٹ او رغیر ملکی ڈنر سیٹ خرید لیے جنہیں سرکٹ ہاس اور سول ریسٹ ہاؤس پہنچایا گیا۔

یہاں یہ بات قابل ذکر ہے کہ وزیر اعلیٰ پنجاب سردار عثمان بزدار میڈیا کے تندوتیز سوالات سے بچنے اورمتاثرہ خاندان سے ملاقات کئے بغیر ہی لاہور کے لیے چلے گئے، انہوں نے ایک کپ چائے بھی نہیں پی جبکہ سرکاری نوکری کے تقاضوں کو سمجھنے والے افسران نے وزیر اعلیٰ کے استقبال اورآسائشوں کے لیے چند لمحوں میں ہی قومی خزانے سے لاکھوں روپے کی انتہائی مہنگی خریداری کرڈالی۔

ذرائع کے مطابق وزیر اعلیٰ پنجاب سردار عثمان بزدار کی ساہیوال سے روانگی کے فوری بعد لاکھوں روپے سے خریدی گئی قیمتی بیڈ شیٹیں اور مہنگی ترین غیرملکی کراکری اور دیگر پرتعیش اشیا مبینہ طور پر مختلف افسران کے گھروں میں منتقل کردی گئیں۔

یاد رہے کہ وزیر اعلیٰ پنجاب سردار عثمان بزدار کا دورہ ساہیوال پہلے ہی تنقید کی زد میں ہے جس کی وجہ وزیراعلی پنجاب سردار عثمان بزدار کا اسپتال میں زیر علاج زخمی عمیر کو پھولوں کا گلدستہ پیش کرنا تھا۔