سعودی عرب کا صنعاء میں آئل کمپنی کا ڈپو خالی کرنے کا حکم، ممکنہ فوجی کارروائی سے قبل شہریوں کو انتباہ

ریاض (ڈیلی اردو) سعودی عرب نے یمن کے دارالحکومت صنعاء میں یمن آئل کمپنی کے مرکزی ڈپو ’’الصباحہ‘‘ کے مخصوص مقام کو خالی کرنے کے لیے شہریوں کو انتباہ جاری کردیا ہے۔

 سعودی وزارتِ دفاع کے ترجمان میجر جنرل ترکی المالکی کے مطابق یہ ہدایت ممکنہ خصوصی فوجی کارروائی سے قبل شہریوں کی حفاظت کے پیش نظر دی گئی ہے۔ شہریوں سے کہا گیا ہے کہ وہ جاری کردہ نقشے میں نشان زد مقام سے دور ہوجائیں۔

 اسکائی نیوز عربیہ کے مطابق یہ اعلان ایسے وقت میں سامنے آیا ہے جب سعودی حکام نے ریاض کی سمت داغے گئے حوثی باغیوں کے بیلسٹک میزائل کو روک کر تباہ کرنے کا دعویٰ کیا تھا۔ اس سے قبل سعودی حکام نے ریاض کے شاہ خالد بین الاقوامی ہوائی اڈے کو نشانہ بنانے والے حملے پر سخت ردعمل دینے کا عندیہ بھی دیا تھا، جبکہ حملوں کے بعد ہوائی اڈے پر پروازوں کی سرگرمیاں معطل کیے جانے کی اطلاع سامنے آئی۔

 امریکی حکام نے بھی سعودی عرب میں فضائی سفر سے متعلق احتیاطی اقدامات کیے ہیں۔ صنعاء میں ڈپو خالی کرنے کے انتباہ کے بعد ممکنہ سعودی کارروائی کی نوعیت اور اس کے نتائج سے متعلق صورتحال پر توجہ مرکوز ہے۔