سوات میں دہشت گردوں کی فائرنگ سے پاکستان زندہ باد موومنٹ کا صدر ہلاک

سوات (ڈیلی اردو) صوبہ خیبر پختونخوا کے سیاحتی ضلع سوات کی تحصیل مٹہ میں دہشت گردوں کی فائرنگ سے پاکستان زندہ باد موومنٹ کے ڈویژنل صدر اعجاز پشتون ہلاک جبکہ پولیس اہلکار زخمی ہوگیا ہے۔

پولیس کے مطابق سوات کی تحصیل مٹہ کے علاقہ پیوچار میں مسلح دہشت گردوں کی کار پر فائرنگ سے پاکستان زندہ باد موومنٹ ملاکنڈ ویژن کے صدر اعجاز پشتون ہلاک ہوگئے۔

فائرنگ کے واقعہ میں اعجاز پشتون کی سیکیورٹی پر معمور پولیس اہلکار سید رحمان زخمی ہوگئے جبکپ ملزمان واردات کے بعد فرار ہونے میں کامیاب ہوگئے ہیں۔

پولیس اورمقامی لوگوں نے لاش اور زخمیوں کو مٹہ ہسپتال منتقل کر دیا ہے، پولیس نے ملزمان کی تلاش کیلئے علاقے میں سرچ آپریشن شروع کردیا ہے۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔

واضح رہے کہ اعجاز پشتون امن کمیٹی کے ممبر، ویلج کونسل کے چیئرمین بھی تھے، وہ ڈویژن بھر میں پاکستان زندہ باد موومنٹ کی ریلیوں کی قیادت کرتے تھے۔