سوات میں پولیس اور عسکریت پسندوں میں فائرنگ، مقامی شہری ہلاک، کانسٹیبل زخمی

سوات (نمائندہ ڈیلی اردو) پاکستان کے صوبے خیبر پختونخوا کے سیاحتی ضلع سوات کی تحصیل مٹہ کے علاقے گوالیرئی میں پولیس اور عسکریت پسندوں کے درمیان فائرنگ کے تبادلے میں ایک مقامی شہری ہلاک جبکہ ایک پولیس کانسٹیبل زخمی ہو گیا۔

پولیس ذرائع کے مطابق، عسکریت پسندوں کی موجودگی کی اطلاع پر سیکیورٹی فورسز نے علاقے میں سرچ آپریشن کا آغاز کیا، جس دوران فائرنگ کا تبادلہ ہوا۔ واقعے میں جہان پاجا نامی مقامی شخص گولی لگنے سے ہلاک ہوا، جب کہ زخمی پولیس اہلکار کو طبی امداد کے لیے ہسپتال منتقل کر دیا گیا ہے۔

ذرائع کا کہنا ہے کہ علاقے میں سیکیورٹی مزید سخت کر دی گئی ہے اور بھاری تعداد میں پولیس نفری تعینات کر دی گئی ہے تاکہ کسی بھی ممکنہ خطرے سے نمٹا جا سکے۔