سیستان و بلوچستان : سراوان میں جھڑپ، آئی آر جی سی کے 2 کمانڈر اور 5 دہشتگرد ہلاک

تہران( ڈیلی اردو) ایران کے جنوب مشرقی صوبے سیستان و بلوچستان کے ضلع سراوان میں سکیورٹی فورسز اور مسلح افراد کے درمیان جھڑپ میں پاسداران انقلاب اسلامی (آئی آر جی سی) کے دو کمانڈر ہلاک ہوگئے، جبکہ ایرانی حکام کے مطابق کارروائی میں 5 دہشتگرد بھی مارے گئے۔

ایرانی میڈیا کے مطابق ہلاک ہونے والوں میں بریگیڈیئر جنرل حسین ظریفی اور قرارگاہ سجاد کے انٹیلی جنس کمانڈر میجر احمد زراعتی شامل ہیں۔ حسین ظریفی قرارگاہ سجاد کے کمانڈر کے طور پر ذمہ داریاں انجام دے رہے تھے۔

ایرانی حکام کے مطابق سراوان کے علاقے میں مسلح افراد کے خلاف کارروائی کے دوران سکیورٹی فورسز اور دہشتگردوں کے درمیان فائرنگ کا تبادلہ ہوا، جس میں دونوں کمانڈر ہلاک ہوئے جبکہ 5 دہشتگرد بھی مارے گئے۔

رپورٹس کے مطابق کارروائی کے دوران سکیورٹی فورسز نے مسلح افراد کے زیر استعمال ٹھکانوں کو نشانہ بنایا اور اسلحہ و گولہ بارود بھی برآمد کیا۔ ایرانی حکام نے کارروائی کو انٹیلی جنس معلومات کی بنیاد پر کیا گیا آپریشن قرار دیا ہے۔

ایرانی میڈیا نے جھڑپ میں مارے جانے والے افراد کو دہشتگرد قرار دیا ہے، تاہم دستیاب اطلاعات میں متعلقہ گروہ کی شناخت کے بارے میں مختلف دعوے سامنے آئے ہیں۔ بعض رپورٹس میں جیش العدل کا نام بھی سامنے آیا ہے، جبکہ ایرانی حکام کے ابتدائی بیان میں گروہ کا نام واضح نہیں کیا گیا۔

سیستان و بلوچستان ایران کا سرحدی صوبہ ہے جہاں ماضی میں بھی سکیورٹی فورسز اور مسلح گروہوں کے درمیان متعدد جھڑپیں ہوچکی ہیں۔ صوبے کی سرحدیں پاکستان اور افغانستان سے ملتی ہیں اور یہاں طویل عرصے سے سکیورٹی سے متعلق واقعات رپورٹ ہوتے رہے ہیں۔