شام : سابق فوجی افسر جلال کامل صقر گرفتار، جنگی جرائم میں ملوث ہونے کا الزام

دمشق(ڈیلی اردو) شام کی داخلی سکیورٹی فورسز نے لطاکیہ میں سابق حکومت کے فوجی افسر اور 18 ویں انفنٹری بریگیڈ کے سابق کمانڈر میجر جنرل جلال کامل صقر کو گرفتار کرلیا ہے۔

شامی سکیورٹی حکام کے مطابق صقر کے خلاف تحقیقات میں شہریوں کے خلاف کارروائیوں، جنگی جرائم اور مبینہ طور پر جبری گرفتاریوں میں ملوث ہونے کے شواہد سامنے آئے ہیں۔

حکام کا کہنا ہے کہ جلال کامل صقر نے دمشق اور مشرقی غوطہ میں شہریوں کے خلاف فوجی کارروائیوں میں حصہ لیا، جبکہ درعا میں شہریوں کی مبینہ جبری گرفتاریوں کی مہمات کی نگرانی بھی کی۔

رپورٹس کے مطابق صقر بعد ازاں 14 ویں ڈویژن کے چیف آف اسٹاف اور نائب کمانڈر کے عہدوں پر بھی فائز رہے اور 2016 کے وسط تک اس ڈویژن کی کمان سنبھالتے رہے۔ بعد میں وہ دمشق میں آپریشنز ڈیپارٹمنٹ سے وابستہ رہے اور یکم مئی 2017 کو فوج سے سبکدوش ہوگئے۔

شامی حکام کے مطابق گرفتاری کے بعد ان کے خلاف قانونی کارروائی اور تحقیقات جاری ہیں۔