شام: درعا میں داعش سے وابستہ اہم کمانڈر گرفتار، 3 سیکیورٹی اہلکاروں کی ہلاکت کا الزام

دمشق(ڈیلی اردو) شام کے جنوبی صوبے درعا میں سیکیورٹی فورسز نے داعش سے مبینہ طور پر وابستہ ایک اہم کمانڈر کو گرفتار کرلیا، جس پر تین سیکیورٹی اہلکاروں کی ہلاکت میں ملوث گروہ کی قیادت کا الزام ہے۔

شامی خبر رساں ادارے سانا کے مطابق سیکیورٹی اہلکاروں نے درعا کے علاقے الصنمین میں کارروائی کرتے ہوئے ولید الفلاح نامی شخص کو حراست میں لیا، جسے تین سیکیورٹی اہلکاروں کی ہلاکت میں ملوث مسلح گروہ کے اہم رہنماؤں میں شمار کیا جاتا ہے۔

رپورٹس کے مطابق تینوں اہلکار ایک مطلوب شخص کے خلاف کارروائی کے دوران مسلح افراد کے ساتھ جھڑپ میں ہلاک ہوئے تھے۔ شامی حکام کا کہنا ہے کہ مطلوب شخص کا تعلق داعش سے تھا۔

کارروائی کے بعد سیکیورٹی فورسز نے مزید پانچ افراد کو بھی گرفتار کیا۔ وزارت داخلہ کے ترجمان نورالدین البابا کے مطابق آپریشن کے دوران جرائم پیشہ عناصر اور داعش سے منسلک مبینہ خلیوں کے درمیان روابط کا بھی سراغ ملا ہے۔

شامی حکومت کے مطابق ملک میں داعش کے خلاف کارروائیاں جاری ہیں اور تنظیم کی کچھ باقی ماندہ سرگرمیاں جنوبی علاقوں میں موجود خفیہ خلیوں تک محدود ہیں۔