شام: درعا میں دستی بم کے دھماکے سے خاتون ہلاک، شوہر شدید زخمی

دمشق(ڈیلی اردو) شام کے صوبہ درعا کے نواحی علاقے عتمان میں دستی بم کے دھماکے سے ایک خاتون ہلاک ہوگئی، جبکہ اس کا شوہر شدید زخمی ہوگیا۔ واقعہ رواں ماہ کی 21 تاریخ کو پیش آیا تھا۔

مقامی ذرائع کے مطابق سیکیورٹی اداروں کی تحقیقات میں واقعے کی تفصیلات سامنے آئی ہیں۔ تحقیقات کے مطابق شوہر مبینہ طور پر منشیات کے زیر اثر تھا اور اس نے اپنی اہلیہ کے سر کے قریب دستی بم پھاڑ دیا، جس کے نتیجے میں خاتون موقع پر ہلاک ہوگئی جبکہ شوہر بھی دھماکے کی زد میں آکر شدید زخمی ہوگیا۔

واقعے کے بعد متعلقہ حکام نے تحقیقات شروع کرتے ہوئے جائے وقوعہ کی تلاشی لی۔ کارروائی کے دوران اسلحہ، گولہ بارود اور مبینہ طور پر منشیات کی مختلف اقسام برآمد ہونے کی اطلاع ہے۔