شام میں اسرائیلی فوج کا سرچ آپریشن

دمشق (ڈیلی اردو)  شامی سرکاری میڈیا کے مطابق اسرائیلی فورسز نے شام کے صوبہ قنیطرہ میں ایک فوجی کارروائی کرتے ہوئے گاؤں الصمدانیہ میں داخل ہو کر مختصر وقت کے لیے چیک پوسٹ قائم کی۔

رپورٹس کے مطابق تین اسرائیلی فوجی گاڑیاں گاؤں میں داخل ہوئیں، جہاں اہلکاروں نے عارضی ناکہ قائم کیا، شہریوں کی تلاشی لی اور بعد ازاں علاقے سے واپس چلے گئے۔

شام کی سرکاری خبر رساں ایجنسی سانا (SANA) کے مطابق یہ کارروائی ایک روز قبل ہونے والی مبینہ اسرائیلی پیش قدمی کے بعد کی گئی، جس میں اسرائیلی فوج کی 15 سے زائد گاڑیاں جنوبی قنیطرہ کے علاقے العشا میں داخل ہوئی تھیں۔

سانا کے مطابق اس کارروائی کے دوران اسرائیلی اہلکاروں نے ایک گھر اور ایک گودام کی تلاشی لی، جس کے بعد وہ علاقے سے واپس چلے گئے۔

رپورٹ کے مطابق اسرائیلی حکام نے ان کارروائیوں پر فوری طور پر کوئی تبصرہ نہیں کیا۔

قنیطرہ کا علاقہ شام اور اسرائیل کے زیر قبضہ گولان پہاڑیوں کے قریب واقع ہے، جہاں ماضی میں بھی اسرائیلی اور شامی فورسز کے درمیان کشیدگی کے واقعات سامنے آتے رہے ہیں۔