شمالی وزیرستان : سکیورٹی فورسز کی کارروائی، 7 دہشتگرد ہلاک، اسلحہ و گولہ بارود برآمد

شمالی وزیرستان(ڈیلی اردو) سکیورٹی فورسز نے خیبرپختونخواہ کے شورش زدہ ضلع شمالی وزیرستان میں انٹیلی جنس معلومات کی بنیاد پر کارروائی کرتے ہوئے 7 دہشتگردوں کو ہلاک کردیا، جبکہ ان کے ٹھکانوں کو بھی تباہ کردیا گیا۔ کارروائی کے دوران بھاری مقدار میں اسلحہ اور گولہ بارود برآمد کیا گیا۔

سکیورٹی ذرائع کے مطابق یہ کارروائی دہشتگردوں کی موجودگی سے متعلق مصدقہ معلومات ملنے پر کی گئی۔ کارروائی میں ہلاک ہونے والے دہشتگردوں کے قبضے سے اسلحہ اور گولہ بارود برآمد ہوا، جبکہ ان کے زیر استعمال ٹھکانوں کو بھی نشانہ بنایا گیا تاکہ دہشتگرد نیٹ ورک کی سرگرمیوں اور دوبارہ منظم ہونے کی صلاحیت کو محدود کیا جاسکے۔

حکام کے مطابق سکیورٹی فورسز کی جانب سے وژن ’’عزمِ استحکام‘‘ کے تحت خیبرپختونخوا میں دہشتگردی کے خلاف انٹیلی جنس بنیادوں پر کارروائیاں جاری ہیں۔ ان کارروائیوں کا مقصد دہشتگردوں کے نیٹ ورک ختم کرنا، ان کے ٹھکانے تباہ کرنا اور سکیورٹی اہلکاروں سمیت شہریوں کی جان و مال کا تحفظ یقینی بنانا ہے۔

سکیورٹی ذرائع نے کہا ہے کہ علاقے میں دہشتگردوں کے خلاف کارروائیاں جاری رہیں گی تاکہ انہیں دوبارہ منظم ہونے اور حملوں کی منصوبہ بندی کے مواقع نہ مل سکیں۔