شمالی وزیرستان: دہشت گردوں کے ہاتھوں اغوا استاد کی لاش برآمد

میرانشاہ (ڈیلی اردو رپورٹ) پاکستان کے شورش زدہ صوبہ خیبرپختونخوا کے قبائلی ضلع شمالی وزیرستان میں اغوا ہونے والے سابق استاد کی لاش برآمد ہوئی ہے۔

مقامی ذرائع کے مطابق تحصیل شیواہ کے علاقے ملک شاہی میں گزشتہ شام دہشت گردوں نے نصیب زادہ نامی شخص کو ان کے گھر سے اغوا کر لیا تھا، جبکہ آج ان کی لاش علاقے سے ملی ہے۔

ذرائع کا کہنا ہے کہ نصیب زادہ پیشے کے اعتبار سے استاد تھے، تاہم کچھ عرصہ قبل انہوں نے تدریس کا شعبہ چھوڑ کر محنت مزدوری کے لیے راولپنڈی کا رخ کیا تھا۔

مقامی افراد کے مطابق نصیب زادہ عید کے موقع پر اپنے آبائی علاقے آئے ہوئے تھے کہ رات کے وقت مسلح افراد انہیں گھر سے اٹھا کر لے گئے۔ بعد ازاں ان کی لاش برآمد ہوئی۔

واقعے کے بعد علاقے میں خوف و ہراس پھیل گیا ہے۔