شمالی وزیرستان میں جے یو آئی رہنما کے گھر کے باہر دھماکہ، مکان کو جزوی نقصان

میرانشاہ(ڈیلی اردو) خیبرپختونخواہ کے شورش زدہ قبائلی ضلع شمالی وزیرستان میں جمعیت علمائے اسلام (جے یو آئی) کے رہنما مولانا مصباح اللہ کے گھر کے مرکزی دروازے کے قریب دھماکہ ہوا، جس کے نتیجے میں مکان کو جزوی نقصان پہنچا، تاہم کسی جانی نقصان کی اطلاع نہیں ملی۔

حکام کے مطابق دھماکہ رات کے وقت مولانا مصباح اللہ کی رہائش گاہ کے مرکزی دروازے پر ہوا، جس سے دروازے اور مکان کے دیگر حصوں کو نقصان پہنچا۔ واقعے کے وقت گھر میں موجود افراد محفوظ رہے۔

دھماکے کی اطلاع ملتے ہی سکیورٹی اداروں کے اہلکار موقع پر پہنچ گئے اور علاقے کو گھیرے میں لے کر شواہد اکٹھے کرنا شروع کردیئے۔ حکام کی جانب سے دھماکے کی نوعیت، اس میں استعمال ہونے والے مواد اور واقعے کے محرکات کا تعین کرنے کے لیے تحقیقات جاری ہیں۔

مولانا مصباح اللہ جے یو آئی کے مقامی رہنما ہونے کے ساتھ وزیراعظم کی قائم کردہ کمیٹی کے رکن بھی ہیں۔ واقعے کے بعد علاقے میں سکیورٹی مزید سخت کردی گئی ہے جبکہ ذمہ دار عناصر کا سراغ لگانے کی کوششیں جاری ہیں۔