شمالی وزیرستان میں سکیورٹی فورسز کی کارروائیاں، 4 اہم کمانڈروں سمیت 9 دہشتگرد ہلاک

میرانشاہ(ڈیلی اردو) خیبرپختونخواہ کے شورش زدہ قبائلی ضلع شمالی وزیرستان کے مختلف علاقوں میں سکیورٹی فورسز نے خفیہ اطلاعات کی بنیاد پر کارروائیاں کرتے ہوئے 4 اہم کمانڈروں سمیت 9 دہشتگردوں کو ہلاک کردیا۔

سکیورٹی ذرائع کے مطابق یہ کارروائیاں شمالی وزیرستان کے علاقوں پالنگ زئی، ندیم کوٹ اور کوٹ خزری میں کی گئیں، جہاں دہشتگردوں کی موجودگی اور سرگرمیوں سے متعلق قابلِ اعتماد اطلاعات موصول ہوئی تھیں۔

ذرائع کے مطابق کارروائیوں کے دوران ہلاک ہونے والے دہشتگردوں میں چار اہم کمانڈر خالد رضا، کامران، موسیٰ اور مفتوم بھی شامل ہیں۔ ان کمانڈروں کی ہلاکت کو دہشتگرد تنظیم کے لیے بڑا نقصان قرار دیا جا رہا ہے، کیونکہ ان کے ذریعے علاقے میں دہشتگردوں کی سرگرمیوں، رابطہ کاری اور کارروائیوں کی نگرانی کی جاتی تھی۔

سکیورٹی فورسز نے انٹیلی جنس معلومات کی بنیاد پر دہشتگردوں کے ٹھکانوں اور پوزیشنز کو نشانہ بنایا، جس کے نتیجے میں متعدد خفیہ ٹھکانے تباہ کردیئے گئے۔ کارروائی کے بعد علاقے کو کلیئر کیا گیا اور دہشتگردوں کے زیر استعمال اسلحہ، گولہ بارود اور دیگر فوجی سامان بھی برآمد کرلیا گیا۔

سکیورٹی ذرائع کے مطابق تباہ کیے گئے ٹھکانے دہشتگردوں کی منصوبہ بندی، رابطہ کاری اور دیگر تخریبی سرگرمیوں کے لیے استعمال کیے جا رہے تھے۔ کارروائیوں کا مقصد شمالی وزیرستان میں دہشتگردوں کے نیٹ ورک، کمانڈ ڈھانچے اور معاون انفراسٹرکچر کو ختم کرنا ہے۔

سکیورٹی فورسز کی جانب سے واضح کیا گیا ہے کہ خفیہ اطلاعات کی بنیاد پر دہشتگردوں کے خلاف کارروائیاں جاری رہیں گی اور کسی بھی علاقے میں ان کے محفوظ ٹھکانے قائم نہیں ہونے دیے جائیں گے۔ حکام کے مطابق کارروائیوں کا بنیادی مقصد مقامی آبادی کے جان و مال کے تحفظ اور خیبر پختونخوا سمیت ملک میں پائیدار امن کے قیام کو یقینی بنانا ہے۔