شمالی وزیرستان میں سیکیورٹی فورسز کی کارروائیاں، 7 دہشت گرد ہلاک

راولپنڈی (ڈیلی اردو) سیکیورٹی فورسز نے صوبہ خیبر پختونخوا کے قبائلی ضلع شمالی وزیرستان کے علاقوں میران شاہ اور اسپن وام میں کارروائی کرتے ہوئے 7 دہشت گرد مارے گئے جبکہ فائرنگ کے شدید تبادلے میں لانس نائیک محمد امین بھی ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان میں انٹیلی جنس کی بنیاد پر 2 الگ الگ آپریشن کیے۔

آئی ایس پی آر کے مطابق سیکیورٹی فورسز نے دہشت گردوں کی موجودگی کی خفیہ اطلاع پر پہلا آپریشن میران شاہ جبکہ دوسرا اسپن وام میں کیا۔

آئی ایس پی آر کا کہنا تھا کہ پہلے آپریشن میں 4 خارجی دہشت گرد جبکہ دوسرے آپریشن میں 3 دہشت گرد مارے گئے۔

پاک فوج کے شعبہ تعلقات عامہ کے مطابق دونوں آپریشن میں 7 خارجی دہشت گرد مارے گئے، جبکہ آپریشن کے دوران فائرنگ کے تبادلے میں بہادری سے لڑتے ہوئے لانس نائیک محمد امین بھی ہلاک ہوگئے۔

آئی ایس پی آر کا کہنا تھا کہ علاقے میں مزید خارجی دہشت گردوں کو ختم کرنے کے لیے کلیئرنس آپریشن کیا جا رہا ہے۔

واضح رہے کہ گزشتہ روز سیکیورٹی فورسز نے بلوچستان کے ضلع ژوب میں کامیاب آپریشن کرتے ہوئے 15 دہشت گردوں کو ہلاک کردیا تھا۔ آئی ایس پی آر نے بتایا تھا کہ آپریشن کے دوران شدید فائرنگ کے تبادلے میں سپاہی عارف الرحمٰن ہلاک ہوگئے تھے۔