شمالی وزیرستان میں سیکیورٹی فورسز کی کارروائی، 4 دہشتگرد ہلاک، 2 زخمی

میرانشاہ(ڈیلی اردو)شمالی وزیرستان کے علاقے شیوہ میں گشت پر مامور سیکیورٹی فورسز پر فائرنگ کے بعد جوابی کارروائی میں چار دہشتگرد ہلاک جبکہ دو زخمی ہوگئے۔ واقعے کے بعد علاقے میں سیکیورٹی مزید سخت کرتے ہوئے ممکنہ طور پر موجود دیگر دہشتگردوں کی تلاش کے لیے سرچ آپریشن شروع کر دیا گیا۔

سیکیورٹی ذرائع کے مطابق شیوہ تحصیل کے گاؤں رگزی میں معمول کی گشت کے دوران دہشتگردوں نے فورسز کو نشانہ بناتے ہوئے فائرنگ کی، جس پر اہلکاروں نے فوری جوابی کارروائی کی اور حملہ آوروں کا تعاقب شروع کردیا۔

ذرائع کا کہنا ہے کہ دہشتگردوں اور سیکیورٹی فورسز کے درمیان فائرنگ کا شدید تبادلہ ہوا، جس کے دوران چار دہشتگرد ہلاک جبکہ دو دیگر زخمی ہوگئے۔

ہلاک ہونے والے دہشتگردوں کی لاشیں شناخت اور دیگر قانونی کارروائی کے لیے ہیڈکوارٹر اسپتال منتقل کردی گئیں۔

جھڑپ کے بعد سیکیورٹی فورسز نے علاقے میں نگرانی اور سیکیورٹی کے اقدامات مزید بڑھا دیے جبکہ اطراف میں سرچ آپریشن بھی شروع کیا گیا تاکہ ممکنہ طور پر چھپے دیگر دہشتگردوں کا سراغ لگایا جا سکے۔

شمالی وزیرستان میں سیکیورٹی فورسز کی جانب سے دہشتگردی کے خلاف انٹیلی جنس بنیادوں پر کارروائیاں اور کلیئرنس آپریشنز کا سلسلہ بھی جاری ہے۔