شمالی وزیرستان میں نامعلوم افراد کی فائرنگ سے پی ٹی سی ایل ملازم ہلاک

میران شاہ (ڈیلی اردو/ٹی این این) شمالی وزیرستان میں نامعلوم افراد نے پی ٹی سی ایل اہلکار کو گولی مار کر ہلاک کردیا۔

میر علی پولیس کے مطابق پی ٹی سی ایل ملازم کی شناخت زربت خان کے نام سے ہوئی ہے۔

پولیس نے مزید کہا کہ لاش کو ڈسٹرکٹ ہسپتال منتقل کردیا گیا ہے۔ پولیس نے مقدمہ درج کر کے تفتیش شروع کر دی ہے۔

مقامی ذرائع کے مطابق زربت خان یوتھ آف وزیرستان سے تعلق رکھنے والے وقار احمد کا والد تھا۔ وقار احمد کو ایک سال قبل باقی تین ساتھیوں سمیت ہلاک کیا گیا تھا۔

چند روز قبل شمالی وزیرستان میں جمعیت علمائے اسلام کے سوشل میڈیا انچارج جاوید نور کو بھی نامعلوم افراد نے فائرنگ کرکے شدید زخمی کردیا تھا۔ اس سے قبل گاٶں تپی سے تعلق رکھنے والے سی ٹی ڈی اہلکار تسکین اللہ کو بھی نامعلوم افراد نے ہلاک کر دیا تھا۔

ذرائع کے مطابق شمالی وزیرستان میں ٹارگٹ کلنگ کا سلسلہ بدستوری جاری ہے۔ آپریشن ضرب عضب کے بعد اب تک پانچ سو سے زاٸد لوگ ٹارگٹ کلنگ میں مارے جا چکے ہیں۔